Elmar Baxşıyev: "Sırf kuboka köklənməmişik"
Misli premyer-liqasının 26-cı turunda "Turan Tovuz" "Qəbələ" ilə heç-heçə edib - 1:1.
Football-plus.az xəbər verir ki, görüşdən sonra hər iki komandanın baş məşqçisinin mətbuat konfransı keçirilib.
Əvvəlcə qonaq komandanın çalışdırıcısı Elmar Baxşıyev görüş haqda fikirlərini səsləndirib:
"Maraqlı oyun alındı. Hər iki komanda meydanda əzmkarlıq göstərdi. Futbolçularım onlardan istədiklərimi etməyə çalışdılar. Daha çox hücum etmək istəyirdik. Bu məsələdə komandadan razı qaldım. İnanıram ki, qarşıdakı matçlarda yaratdığımız epizodları dəyərləndirəcəyik".
- Nəticəni uğurlu hesab edirsiz?
- Bu gün hər iki komanda yaxşı mübarizə apardı. Heç-heçə ədalətli nəticədi. Tovuz səfəri ağırdı. Süni örtük də narahatlıq yaradır. Buna baxmayaraq komanda xarakter göstərdi.
- Artıq neçənci dəfədi ki, "Zirə"yə çatmaq şansını əldən verirsiz. Çempionatın son pillələrində gedən komandalarla mübarizə aparmaq çətindi?
- Biz də həmin rəqabətin içindəyik. Buna davam gətirməliyik. Hər matça maksimum köklənmək lazımdı. Komandanın oyun planı var. Meydanda mənim istədiyimi verirlər. Belə davam etsək, nəticələr də gələcək.
- Çempionatdan avrokuboklara getmək şansı azalır. Ümidinizi kuboka bağlamısız?
- Sırf kuboka köklənməmişik. Çempionatda da avrokuboklara vəsiqə verən yeri tutmaq istəyirik. Epizodlar yaradırıq, amma dəyərləndirə bilmirik. Bir az soyuqqanlılıq lazımdır. Bu, problem deyil. Futbolun içində olan prosesdi. Normal qəbul edirəm.
İLKİN SULTANLI, Tovuz
Digər xəbərlər
