Təmsilçimiz ''Qarabağ'' üçün avrokubok mövsümü başa çatdıgından artıq diqqətimizi qardaş ölkə Türkiyənin klublarına yönəldəcəyik.

"Football-plus.az"-ın məlumatına görə, ''Trabzonspor''un mübarizəni dayandırmasına baxmayaraq Türkiyənin 3 təmsilçisi hələ də yoluna davam edir və bu, çox yaxşı göstəricidi.

"Fənərbaxça'' Avropa Liqasının 1/8 finalında İspaniyada ''Sevilya'' ilə qarşılaşacaq. Konfrans Liqasının 1/8 finalında isə ''Sivasspor'' ''Fiorentina''nın, ''İstanbul BŞ'' bizə gözəl tanış olan ''Gent''in qonağı olacaq. Ümid edək ki, başakşəhərlilər Belçika klubundan ''Qarabağ''ın qisasını ala biləcək. Hər 3 oyun Bakı vaxtı ilə saat 00.00-da başlayacaq.

Yeri gəlmişkən, bu qarşılaşmalar UEFA-nın əmsallar cədvəli baxımından da mühüm əhəmiyyət kəsb edir. Türkiyə hazırda bu cədvəldə 31,500 xalla 12-ci pillədə qərarlaşıb. Mövsümü ilk ''11-lik''də bitirmək önəmlidi. Türkiyə bunu bacaracağı təqdirdə 2024/25-də ölkə çempionu yenidən birbaşa qrup mərhələsinə vəsiqə qazanacaq! Türkiyə üçün əla fürsət yaranıb. 11-ci pillədə qərarlaşan və artıq heç bir təmsilçisi qalmayan Serbiyanın 32,375 xalı var. Türkiyə bu mövsüm Avropada qələbəyə 0,400, bərabərliyə 0,200 xal qazanır.

Bu da o deməkdi ki, 3 klub bu gün vətənə 2 qələbə, 1 heç-heçə ilə qayıtsa, Türkiyə artıq indidən cədvəldə 11-ci pilləyə yüksələcək.