Bilindiyi kimi UEFA-nın əmsallar cədvəlində 20-ci pilləyə qədər geriləyən Türkiyə artıq çempionunu birbaşa ÇL-in qrupuna göndərə bilmir.

Football-plus.az xəbər verir ki, gələn mövsümdən etibarən isə qardaş ölkəni Avropada 5 yox, 4 klub təmsil edəcək. Bunun səbəbi odu ki, Türkiyə əmsallar cədvəlində ilbəil geriləyir. Sonuncu yüksəliş 2016/17-də baş verib. O vaxt bu cədvəldə 11-ci pillədən 10-cu pilləyə qalxmaq mümkün olmuşdu. Bilindiyi kimi cədvəl son 5 mövsümün nəticələrinə əsasən tərtib olunur. Məsələn, Türkiyə klublarının bu mövsümkü nəticələri yalnız 2024/25-in hesablamalarında nəzərə alınacaq. Bəs görəsən son 5 mövsümdə Türkiyəyə ən çox reytinq xalı qazandıran klublar hansılardı?

Türkiyəni son 5 ildə avrokuboklarda 10 fərqli klub təmsil edib. Onların arasında ən uğurlusu ''Qalatasaray''dı. ''Cim-Bom'' bu müddətdə ölkə futboluna 35,5 xallıq töhfə verib. Maraqlıdı ki, digər İstanbul nəhəngləri – ''Beşiktaş'' (17 xal) və ''Fənərbaxça'' (14,5 xal) uyğun olaraq 3 və 4-cü pillədə qərarlaşıb! 2-ci pillədə isə 24,5 xalla ''İstanbul BŞ'' qərarlaşıb. Digər klublardan ''Sivasspor'' (8 xal) 5-ci, ''Trabzonspor'' (6) 6-cı pillədədi.