Bu bayram günlərində Çempionlar Liqası yenə bizi darıxmağa qoymayacaq.

Football-plus.az xəbər verir ki, heyəti ulduzlarla zəngin PSJ 2021-də olduğu kimi, yenə Münheni fəth etməyə səy göstərəcək. Ən çətin vəzifə “Brügge”dədi. Hərçənd ÇL tarixində evdə 2 topla uduzandan sonra mərhələ adlayan klub olub...

8 mart
Bavariya – PSJ 2:0
Erik Çupo-Motinq, 61. Serj Qnabri, 89
Hakim: Daniele Orsato (İtaliya)
Cəzalı: Pavar/yoxdu
Avrokuboklardakı oyunlarının balansı: +6=0-6
İlk oyun – 1:0

Bu həftə bəlkə də nəticəsi ən böyük maraqla gözlənilən oyun məhz budu. ÇL-in finalına layiq olan bu duelin Parisdəki ilk oyununda “Bavariya” qalib gəlsə də, bütün suallara Münhendə aydınlıq gələcək. İlk görüşdə zədədən yeni qayıdan Mbappe yalnız 2-ci hissədə meydana çıxmışdı. Amma indi fransalı forvard mükəmməl formada və yüksək əhval-ruhiyyədədi. Çünki Liqa-1-in son oyununda PSJ-nin heyətindəı 201-ci qolunu vurmaqla klub tarixinin ən məhsuldar oyunçusuna çevrildi. “Bavariya”ya məğlubiyyətdən bu yana PSJ Liqa-1-də 3 oyuna 11 qol vurub və bunların 9-da Mbappe ilə Messi yaxından iştirak edib! Bu mükəmməl cütlük Münhendə də parislilərin əsas ümid yeri olacaq. “Bavariya” Çl-də öz meydanında son 17 qarşılaşmanın yalnız 1-də uduzub (15 qələbə). Həmin məğlubiyyət 2020/21-in 1/8 finalında məhz elə PSJ ilə oyunda qeydə alınıb (2:3). “Bavariya” tarixində 27 dəfə pley-offa səfər qələbəsi ilə başlayıb və bunların yalnız 1-də mərhələni adlaya bilməyib. Bu, 2010/11-də ÇL-in 1/8 finalında “İnter”lə dueldə (səfərdə 1:0, evdə 2:3) baş verib. 2020-də ÇL-in finalında “Bavariya”ya minimal hesablı məğlubiyyəti bir kənara qoysaq, PSJ-nin avrokubokların pley-offunda Almaniya klublarına qarşı keçirdiyi son 5 duelin hamısından qələbəylə ayrılması diqqəti çəkir. Onu da bildirək ki, Paris nəhəngi buna qədər tarixi ərzində cəmi 6 dəfə pley-offa ev məğlubiyyəti ilə başlamışdı. Komanda bunların heç birində mərhələni adlaya bilməyib!

Tottenhem – Milan 0:0
Hakim: Kleman Turpen (Fransa)
Cəzalı: yoxdu
Avrokuboklardakı oyunlarının balansı: +2=2-1
İlk oyun – 0:1

“Milan”ın cavab oyunu ərəfəsində cüzi üstünlüyü olsa da, komanda bu mövsüm qeyri-sabit təsir bağışlayır. Düzdü, eyni sözləri “Tottenhem” haqda da söyləmək olar. Ona görə də cavab oyununda istənilən nəticənin qeydə alınması, eləcə də duelin əlavə vaxta, hətta penalti seriyasına qədər uzanması mümkündü. Maraqlıdı ki, “Milan” sonuncu dəfə ÇL-də 1/8 final mərhələsini adlayarkən rəqib məhz London təmsilçisi olmuşdu. Söhbət “Tottenhem”in əzəli rəqibi “Arsenal”dan gedir. 2011/12-də “rossonyerlər” cavab oyununda səfərdə 3 cavabsız qolla uduzsalar da, 1/4 finala adlamışdılar. Çünki komanda evdəki ilk oyunda 4 cavabsız qolla qalib gəlmişdi. “Tottenhem”in avrokuboklarda son 13 ev oyununda 11 qələbə qazanması diqqəti çəkir. Bundan başqa komanda tarixi ərzində evdə İtaliya təmsilçiləırinə qarşı keçirdiyi 9 oyunun yalnız 1-də məğlub olub (5 qələbə, 3 heç-heçə). Yeganə məğlubiyyət 2017/18-də ÇL-in 1/8 finalında “Yuventus”la oyunda qeydə alınıb (1:2). Həmin oyun “Uembli”də keçirilmişdi. Statistikaya görə “Tottenhem”in mərhələ adlamaq şansı təxminən 50 faizdi. Çünki komanda indiyə qədər pley-offa səfər məğlubiyyəti ilə başladığı 19 halın 10-da sonda istəyinə çatıb. İlk oyundakı qələbə “Milan”ın İngiltərə klublarına qarşı 5 oyunluq məğlubiyyət seriyasına son qoydu. Ümumiyyətlə, “Milan” İngiltərə təmsilçilərinə qarşı çox zəif təsir bağışlayır (son 18 oyunda cəmi 2 qələbə, 12 məğlubiyyət).