Fransa Futbol Federasiyasında (FFF) 2011-ci ildən bəri davam edən Noel Le Qre dönəmi, çox güman, ən qısa müddətdə başa çatacaq.

Xəbər verdiyimiz kimi, qurumun prezidenti bir neçə gün öncə yığmanın çalışdırıcısı Didye Deşamla dördillik yeni müqavilə imzalamışdı.

FFF-nin İcraiyyə Komitəsinə bu barədə məlumat verməyən və faktiki təkbaşına bu qərarı qəbul edən Le Qre daha sonra Zinəddin Zidanı ələ salmaqla Fransada nifrət obyektinə çevrilmişdi. O, “Zidanın zənginə cavab vermərəm” sözünə görə üzr istəsə də, futbol ictimaiyyəti 81 yaşlı prezidentin istefasını tələb edirdi.

Football-plus.az xəbər verir ki, bu hay-həşirdə futbol meneceri Sonya Suidin onu təcavüzdə günahlandırması həlledici oldu. “RMC Sport” xəbər verir ki, FFF-nin İcraiyyə Komitəsinin qərarı ilə həm Zidanla bağlı sözlərinə, həm də cinsi təcavüzdə günahlandırıldığına görə Le Qre vəzifəsindən kənarlaşdırılıb! Onun vəzifəsini müvəqqəti vitse-prezident Filipp Diallo icra edəcək. FFF Le Qrenin durumunu araşdıraraq onunla bağlı yekun qərarı yanvarın sonuna qədər açıqlayacaq.

Qeyd edək ki, bu qurumda xanımlara münasibətin birmənalı olmaması haqda şayiələr hələ ötən ilin sentyabrında yayılmışdı. “So Foot” nəşri geniş bir araşdırmadan sonra bu mövzu ilə bağlı yazı dərc etmişdi. Məlum olmuşdu ki, Le Qre qurumda çalışan bir çox xanıma dəfələrlə söz atıb, nalayiq mesajlar göndərib, sataşıb və görüşə çağırıb. Bu üzdən onlardan bəziləri istefa vermək məcburiyyətində qalmışdı. Amma bu son hadisələrin ardından əvvəlcə Sonya Suid, sonra da FFF-nin sabiq xanım əməkdaşları Le Qreyə qarşı ifadə verməyə hazır olduqlarını bildiriblər. Suidin sözlərinə görə, Le Qre heç vaxt onu ciddi qəbul etməyib və həmişə ona seksual obyekt kimi baxıb. Bu xanımın dediklərinə inansaq, 2014-cü ildə Le Qre ilə iş məsələlərini həll etmək üçün görüşərkən otağa daxil olandan sonra orda iki qədəh şampan görübmüş. Suid həmin gün bir bəhanə ilə ordan uzaqlaşmağı bacardığını qeyd edib. Bu xanımın sözlərindən sonra digər zərərçəkmiş xanımlar da ürəkləniblər. Adı açıqlanmayan bir xanım Le Qrenin onu dəfələrlə görüşə çağırdığını və hər mesajın sonunda “öpürəm” sözünü yazdığını deyib. Bundan başqa, həmin xanımın sözlərinə görə, federasiya rəhbəri dəfələrlə ona gecə saat 22.00 və 23.00-dan sonra zəng vurubmuş. Federasiyanın digər sabiq xanım işçisinin sözünə görə, Le Qre rəsmi səyahətlərin birində əlini onun ayaqlarının üstünə qoyaraq bu xanımdan ətək geyməyi tələb edib. Həmin xanım daha sonra əlavə edib ki, Le Qre bir neçə dəfə iş yerində içkili vəziyyətdə ona işdən sonra görüşməyi təklif edib.