Fransa Futbol Federasiyasında (FFF) cinsi təcavüz və ya buna cəhd ilə bağlı faktlar üzrə istintaq işi yekunlaşmaq üzrədi. Artıq müstəntiqlər FFF-də seksizmlə bağlı hesabat hazırlayıblar.

Football-plus.az xəbər verir ki, Paris prokurorluğu cinsi təcavüzdə ittiham olunduğu üçün yanvarda federasiyanın prezidenti vəzifəsindən kənarlaşdırılan Noel Le Qreyə münasibətdə təhqiqata başlamışdı.

İstintaq prosesində futbol agenti Sonya Sui və FFF-nin bir neçə sabiq əməkdaşı ifadə verib. Müstəntiqlərin hazırladıqları hesabatda belə deyilir:

“Le Qre qadınlarla davranışı, xanım işçilərin ictimaiyyətə açıqlamaları və federasiyanın idarəçiliyindəki uğursuzluqları nəzərə alınarkən artıq Fransa futboluna rəhbərlik etməsi üçün zəruri sayılan legitimliyə malik deyil. Le Qrenin son iki ildəki davranışları idman federasiyasının prezidenti üçün nəzərdə tutulan tələblərə uyğun olmayıb. İstintaqın gedişindəki dinləmələr Le Qrenin qadınlara münasibətdə qəbuledilməz davranışlar nümayiş etdirdiyini ortaya çıxarıb ki, bu davranışlar “seksist” təyini ilə ifadə oluna bilər”.

Bundan başqa, FFF-də seksizm və cinsi təcavüzlə mübarizə üzrə siyasət qeyri-effektiv sayılıb. Hesabata əsasən, təşkilatın daxilində, xüsusilə orta yaşlı əməkdaşlar arasında maçizm (kişinin qadın üzərində aqressiv hakimiyyəti) mədəniyyəti yayılıb. Hesabatın yekun versiyasının fevralın 15-dək hazırlanması planlaşdırlır. Toplanan materiallar Paris prokurorluğuna təqdim olunacaq. Yerli mənbələr Le Qrenin sonda cinsi təcavüz və ya buna cəhd etməkdə günahkar bilinəcəyini proqnozlaşdırır.