Fransa futbolunda çoxdan gözlənilən hadisə baş verib. Noel Le Qre Fransa Futbol Federasiyasının (FFF) prezidenti vəzifəsindən istefa verib.

"Football-plus.az" xəbər verir ki, o, bu qərarını qurumun İcraiyyə Komitəsinin (İK) növbədənkənar iclasında açıqlayıb. İK-nın üzvləri prezident postunda 2011-ci ildən çalışan 81 yaşlı funksionerin istefasını qəbul ediblər.

Xatırladaq ki, Le Qre yanvarda verdiyi müsahibədə Fransa millisinin sabiq futbolçusu Zinəddin Zidanla bağlı sualı heç də normal cavablamamışdı: Zidan yığmanın baş məşqçi vəzifəsinə görə ona zəng edəcəyi halda telefona cavab verməyəcəyini bildirmişdi. Doğrudu, prezident bir neçə gündən sonra ictimaiyyətin təzyiqinə davam gətirməyib 50 yaşlı mütəxəssisdən üzr istəmişdi. Amma çox keçmədən daha ciddi problemlə üzləşmişdi: futbol agenti Sonya Suid onu cinsi təcavüzdə ittiham etmişdi. FFF-də işləyən və milli komandanın bir sıra oyunçularının maraqlarını müdafiə edən menecer funksionerin 2014-cü ildə ona qarşı seksual təcavüzə əl atdığını iddia edir. Federasiyanın bir sıra keçmiş qadın əməkdaşları da prezidentə qarşı eyni ittiham irəli sürüblər. Bu qalmaqalların fonunda Fransanın idman naziri Ameli Udea-Kasteranın tapşırığı ilə FFF-nin ümumi idarəçiliyi ilə bağlı audit yoxlamasına start verilmiş və federasiyanın idarə heyəti təhqiqatın sonuna qədər Le Qrenin fəaliyyətini dayandırmışdı.
Səbəbkar artıq öz istəyi ilə vəzifədən gedib. Paris prokurorluğu ona yönələn ittihamlarla bağlı təhqiqat aparır. Amma Le Qre hələ də ittihamların yalan olduğunu deyir:

“Bu iddianı qətiyyətlə rədd edirəm. Yalan danışsaydım, sizin qarşınıza çıxmazdım. Heç vaxt kiməsə nə mənəvi, nə də cinsi xarakterli təzyiq göstərmişəm. Bütün bu intriqalar məni çox təəccübləndirib. Bunun arxasında kimin dayandığını bilmirəm, amma gec-tez məsələyə aydınlıq gətirəcəyəm”.

FFF-nin artıq sabiq rəhbəri ona məsələnin bütün detallarının məlum olmadığını da deyib:

“Mən heç bir pis iş görməmişəm, indi vəkillərimlə birlikdə işin sonrakı axarını gözləyirik. Bu, prokurorluğun araşdırmasıdı. Yazmışdılar ki, “missis S... deyir ki”, amma bu missis S... kimdi? İttihamlara cavab vermək üçün vəkillərimlə birgə dəfələrlə təhqiqatçılardan məsələ ilə bağlı müfəssəl məlumat almağa çalışşmışıq. Ancaq onlardan heç bir cavab almamışıq. Onu da deyim ki, federasiyada əksər əməkdaşlar mənə çox yaxşı münasibət bəsləyirlər”.