A seriyasında 24-cü tur dörd günü əhatə etdi.

Football-plus.az xəbər verir ki, şənbə günü start götürən tura çərşənbə axşamı keçirilən son iki oyunla yekun vuruldu. Tur Roma və Turin klubları üçün fərqli nəticələrlə yadda qaldı.

Bazar ertəsi keçirilən “Latsio” – “Sampdoriya” matçında yalnız bir qol qeydə alındı. B seriyasına düşməmək üçün çarpışan qonaq komanda güclü rəqibin hücumlarının qarşısını uzun müddət alsa da, sona yaxın hesabda geri düşdü. Luis Albertonun 80-ci dəqiqədə cərimə meydançasının kənarından vurduğu qolu izləməyə dəyərdi. “Latsio” baxımlı qolla xalını 45-ə çatdıraraq cədvəldə 5-ci yerdən 4-ə yüksəldi.

Paytaxtın digər komandası isə turu xalsız başa vurdu. Bəli, “Roma” bu mövsüm liqada qələbə üzü görməyən “Kremoneze”yə uduzdu! Sindroma son qoyan Davide Ballardininin komandası rəqibinin həftəiçi Avropa Liqasında “Zaltsburq”u 2:0 hesabı ilə məğlub etməklə çox güc itirməsindən maksimum yararlandı. Hesabı 17-ci dəqiqədə Tsacutun topu qapının “doqquzluğ”una yönəltməsi ilə açan kremonalılar üçün romalıların ikinci hissədə baş məşqçisiz qalmasının da faydası oldu. Fasilə yenicə sona çatmışdı ki, Joze Mourinyo hakim Marko Piççinininin ünvanına təhqiramiz söz işlətdiyi üçün texniki zonadan qovuldu. O, cərimə meydançasında Kumbullanın Tsacut ilə toqquşmadan sonra qazona yıxılmasına görə penalti təyin olunmamasına görə əsəblərinə hakim ola bilmədi. İlk hissədə qapıya bir dəqiq zərbə belə endirə bilməyən komandasından narazı qalan portuqaliyalı mütəxəsis bir saatlıq mübarizə arxada qalandan sonra hansısa vasitə ilə köməkçisinə birdən-birə 4 dəyişikliyə əl atmaq göstərişini verdi. Meydana yenicə çıxan oyunçular “Roma”nın 71-ci dəqiqədə hesabı bərabərləşdirməsinə şərait yaratdılar. Lakin on dəqiqə sonra qonaqlar növbəti səhvə yol verdilər və qapıçı Patrisionun Okerekeyə qarşı kobud oyununa görə təyin olunan penaltini Çiofani dəqiq yerinə yetirdi. “Kremoneze” cari mövsümdə çempionatda ilk qələbəsini qazanmaqla sonuncu yerdən qurtuldu. Yeri gəlmişkən, Ballardininin komandası fevralın 2-də ölkə kubokunun paytaxtda keçirilən 1/4 final matçında “Roma”nı yenə 2:1 hesabıyla məğlub edərək sensasiyalı şəkildə yarımfinala adlamışdı.
Tura Tirin derbisi ilə yekun vuruldu. “Yuventus” – “Torino” matçı olduqca dramatik axarda keçdi. Qonaq komanda ilk hissədə iki dəfə hesabı öz xeyrinə dəyişdi, amma ev sahibləri də fasiləyə qədər iki qol vurmağa nail oldular. İkinci hissədə daha çox səhv edən “Torino” bunun cəzasını qapısında iki cavabsız top görməklə çəkdi. Braziliyalı müdafiəçi Bremerin sabiq komandasına qol vurmasını və Poqbanın bu mövsüm ilk rəsmi oyuna çıxmasını da qeyd edək.

Xatırladaq ki, fransız futbolçu ötən yay hazırlıq oyununda ağır zədə almış və əməliyyat olunmuşdu.


Faktlar
* “Verona” ilə matçda son nöqtəni qoyan Biraqi qapıya 57,91 metrdən yol tapdı. “Fiorentina”nın müdafiəçisi son 10 ildə A seriyasında ən uzaq məsafədən qol vuran oyunçu oldu. Maraqlıdı ki, 2013-cü ildə florensiyalıların daha bir oyunçusu Ronkalya “Napoli” ilə oyunda 61,48 metrdən qapıçını məyus etmişdi.
* “Latsio” bu mövsüm A seriyasında keçirdiyi 24 oyunun 20-də ilk hissədə qapısını toxunulmaz saxlayıb. Bu, cari mövsümdə qitənin 5 aparıcı liqasında rekord göstəricidi.
* “Kremoneze” A seriyası matçında 27 ildən sonra ilk dəfə fasiləyə hesabda üstün durumda yollandı. Kremonalılar 1996-cı ilin aprelində “Bari” ilə səfər matçının ilk yarısını 1:0 öndə tamamlasalar da, sonda 1:2 hesabı ilə uduzmuşdular.
* Turin derbisində 28 ildən sonra ilk hissədə azı 4 qol vuruldu. Sonuncu belə hal 1995-ci ilin yanvarında qeydə alınmışdı. Onda “Torino” “Yuventus”a 3:2 hesabı ilə qalib gəlmiş və bütün qollar fasiləyə qədər vurulmuşdu.
* “Yuventus”un qapısına 92-ci saniyədə yol tapan Karamo A seriyasında keçirilən Turin derbilərində ən erkən qolun müəllifi oldu.
* Şçensnı “Yuventus”da bütün turnirlərdə 200-cü, Aleks Sandro isə 300-cü oyununu keçirdi.
* Poqba 315 gündən sonra rəsmi oyunda iştirak etdi. Fransalı yarımmüdafiəçi sonuncu dəfə yaşıl meydanda 2022-ci ilin aprelində sabiq klubu “Mançester Yunayted”in heyətində İngiltərə premyer-liqasının “Liverpul”a qarşı matçında (0:4) görünmüşdü.
* Barreneçea “Yuventus”un formasında İtaliya çempionatında debüt etdi.