Misli premyer-liqasında 24-cü turun oyunları keçirilir.

"Səbail" "Qəbələ" ilə qarşılaşıb - 2:2. Matçdan sonra meydan sahiblərinin çalışdırıcısı Şahin Diniyevin mətbuat konfransı keçirilib. Sizi mütəxəssisin fikirləri ilə tanış edirik:

- Komandanız ilk hissədə sanki, toparlana bilmirdi. Oyununuzda nə çatışmırdı?
- Komandanın olduğu yer bizi sıxır, futbolçular təzyiq altındadılar. Nə qədər motivasiya versək də, oyunçular turnir cədvəlinə baxanda sıxılırlar. Uduzmaq qorxusu hələ ki, onların içindən çıxmayıb. Artıq itirəcəyimiz bir şey qalmayanda özünəinam qayıtdı. Əvvəl çəkinə-çəkinə oynayırdıq. Məşqçi olaraq mənim də üzərimdə təzyiq var.

- Matçın başlamasına dəqiqələr qalmış Franko Mazurek zədələndi. Onun durumu nə yerdədi?
- Bu gün ilk dəfə hücumçusuz futbol oynayacaqdıq. Həftə ərzində bunun üzərində işləmişdik. Frankonun zədələnməsi ilə planlarımız pozuldu. Onu itirmək çox çətindi. MRT müayinəsindən sonra durumu bəlli olacaq. Düşünürəm ki, çox uzunmüddətli zədə olmaz. Ayağında burxulma var.

- Yeni transferiniz Matiya Lyuyiç bu gün qol vurdu. Onun oyununu necə dəyərləndirirsiz?
- Tam yox. Bacardığı daha çoxdu. Futbolçunun potensialına bələdəm. Onu çox izləmişdim. Transferin son günlərində onu gətirməklə bağlı qərar verdim. "Uypeşt"də əsas heyətdə yerini itirmişdi. Bir az funksional hazırlığı yerində deyil. Matçın sonlarında gücünün qalmadığı görünürdü. Həqiqətən də keyfiyyətli futbolçudu. Bəlkə də Azərbaycanda ən yaxşı legionerlərdən biri ola bilər.

- Hakim bu gün sərt oyuna icazə verirdi. Onun performansından razı qaldız?
- Hakimlikdən narazı qalsam, özlərinə deyirəm. Bu gün onlarlıq heç nə yoxdu. Bir epizodda biz künc zərbəsi qazanmışdıq, hakim bunu görmədi. Həmin epizodun davamında "Qəbələ" bizə qol vurdu. Ümumi olaraq oyunu yüksək səviyyədə idarə etdilər.

- Komandanız ikinci hissədə daha yaradıcı görünürdü. Növbəti matçlarda da bu cür hücumameyilli oynamağı düşünürsüz?
- Futbolda hücumameyilli, müdafiəyəmeyilli sözləri düzgün deyil. Hücumda oluruqsa, hamı iştirak etməlidi. Müdafiədə də həmçinin. Türkiyədəki təlim-məşq toplanışının bizə çox xeyri dəydi. Fiziki yükləmələrin nəticəsini bu gün görürük. Komandanın gücü var. Hər həftə daha yaxşı olacağıq.