“Bir həftədi Avropadayam. Əvvəlcə Macarıstan - Azərbaycan forumunda iştirak etdim. Daha sonra isə “Mediamark”ın Avropadakı tərəfdaşları ilə görüşlərimiz oldu. Səfər çərçivəsində Belçikada olarkən “Gent”in oyununun olduğunu öyrəndim. Qərara aldım ki, iştirak edim. Çünki “Qarabağ”ın Konfrans Liqasındakı ev oyununda iştirak edə bilmədim. Öz-özümə dedim ki, heç olmasa, “Gent”in stadionunda olum. Klubla bağlı məlumat əldə edim. Maraqlı alındı. Onu deyim ki, stadion möhtəşəm idi. 20 min tutuma malikdi. Mən ilk dəfədi belə arena görürəm. Avropanın, ABŞ-ın, elə Azərbaycanın bir çox stadionlarında olmuşam. Arenaların interyerində, dizaynında müəyyən dəyişikliklər olur. Amma bu tam simmetrikdi. Ona görə mənə çox xoş gəldi. Əla dizayn olunub. Baxmayaraq ki, tutumu azdı. Amma azarkeşlər super ab-hava yarada bilir.

Oyun haqda da danışmaq istəyirəm. Düşünürəm ki, hər iki kollektiv zəif təsir bağışladı. Düzdü, “Gent” 2:0 hesabı ilə qələbə qazandı. Amma mən belə gözləmirdim. Ola bilər ki, güclərini “Qarabağ”a saxlayıblar. Futbolçular bəzən 2-3 dəqiq ötürmə verə bilmirdilər. Ya da həmin zonada öz oyunçularından kimsə olmurdu. 10 gün öncə öz premyer-liqamızda “Sumqayıt” - “Şamaxı” matçını izləyirdim. Sizi inandırım ki, həmin görüş daha maraqlı və məzmunlu idi. “Gent” azarkeşləri stadionu tam doldurmamışdı. Onlarla söhbət də etdim. “Qarabağ”la matçda da stadionun tam dolacağı gözlənilmir. Çünki klubdan küsən fanklublar var. Çempionat oyununda fikir verdim, fanatlar öz futbolçularını, baş məşqçilərini və klub rəsmilərini fitə basırdılar. Onların “Gent”ə inamı tam deyil. Bəziləri etiraf edirdi ki, “Qarabağ” turu keçəcək. Azərbaycan klubunun daha güclü olduğunu düşünürlər. Bir sözlə, “Gent”in son oyunu məndə zəif təəssürat oyatdı. Amma yenə deyirəm, ola bilər ki, güclərini “Qarabağ” üçün saxlayıblar. Təmsilçimiz ilk dəqiqələrdən öz oynunu sərgiləyə bilsə, rahat bu rəqibi keçəcək”.