Belçikanın idman mediası ölkənin aparıcı klublarından “Brügge” ilə “Anderlext”in avrokubok oyunlarına daha geniş yer ayırsa da, “Gent”ə diqqət ayıranlar da var.

Məsələn, bu ölkənin “Nieuwsblad” nəşri Bakıdakı qarşılaşma haqda reportaj hazırlayıb. Stefan Smitin “Gent” “Qarabağ”a məğlubiyyətdən sonra çox işləməlidi” sərlövhəli yazısını kiçik ixtisarla təqdim edirik.

“Gent” çox soyuq Bakıda, demək olar ki, 80 dəqiqə davam gətirdi. Fasilədən sonra penaltini də dəf edən Ruf təslim olana qədər. Düzdü, Orban hesabı bərabərləşdirməyə çalışdı. Ancaq “Gent” cari avrokubok mövsümündə evdə heç kimə uduzmayan rəqibin üstünlüyünü etiraf etməlidi.

Cümə axşamı qış Bakısında heç də qonaqlara rahat deyildi. Qar, yağış, külək Azərbaycan paytaxtının “küləklər şəhəri” imicinə tam uyğun idi. Bu heç də təəccüblü deyildi. “Gent”in start heyətində isə iki təəccüblü məqam var idi. Baş məşqçi Heyn Vanhazebruk qapını Pol Nardiyə yox, son həftələrdə yüksək səviyyədə oyun göstərməyən Deyvi Rufa tapşırmışdı.
Ruf üçün bu, noyabrın 9-dakı kubok oyunundan bəri ilk rəsmi matç idi.

“Gent”in çalışdırıcısı Qodonu sol, Okumunu sağ cinah müdafiəçisi mövqeyinə qoymuşdu, belədə Nqade-Nqacui ilə Torunariqa mərkəz müdafiəçiləri kimi çıxış edəcəkdi. Heç 8 dəqiqə keçməmişdi ki, Nqade-Nqacui ilk səhvə yol verdi, ancaq Rof onun səhvini düzəltdi. Bir qədər sonra Orbanın gözəl asmasından Honq yararlana bilmədi, yoxsa hesab 0:1 olacaqdı. Səfər oyunlarında belə imkanlardan yararlanmaq lazımdı. “Qarabağ” hücumları davam etdirirdi. Yankoviç cərimə meydançasında Okumu ilə toqquşmada yerdə qalanda yerli azarkeşlər əbəs yerə penalti istədi.

Etiraf etmək lazımdı ki, “Gent” fasiləyə qədər oyunun axarına yetərincə nəzarət edə bilmirdi. Meydan sahibləri daim Rofun qapısı həndəvərində görünür, ancaq iş real qol vəziyyətlərinə gedib çatmırdı. 31-ci dəqiqədə Cəfərquliyev qapı torunu yandan silkələdi, hər halda, “Gent” fasiləyə qol buraxmadan yollandı. Bu üzdən Vanhazebruk fasilədə dəyişikliyə ehtiyac görmədi.

Fasilədən dərhal sonra Şeydayev qapıya zərbə endirdi, ancaq Ruf həmin epizodda nə edəcəyini bilirdi. Bir neçə dəqiqə sonra Qurbanlı topu qəbul edib qapıya zərbə vurdu. Torunariqa özünü topun qarşısına atdı. Belədə Polşadan olan VAR briqadası müdaxilə etdi. Daha doğrusu, “Gent”in köhnə tanışı olan Bartoş Frankovski. “Gent”in ötən ilin martında Konfrans Liqasında səfərdə PAOK-a 0:1 uduzduğu oyunu məhz bu hakim idarə etmişdi.

Referi Məhəmməd Əl-Hakim videoyazıya baxmalı oldu. İsveçli düşündü ki, Torunariqa bilərəkdən topa əllə toxunub, bu üzdən “nöqtə”ni göstərdi. Bizdən soruşsaz, sərt hökm idi. Şeydayev topa yaxınlaşdı, ancaq Ruf yenə penalti ustası olduğunu göstərdi. Belə çıxır ki, Vanhazebrukun qapını “Anderlext”lə kubokun finalının qəhrəmanına tapşırması qızıl gediş imiş.

“Qarabağ” ruhdan düşmədi və son 15 dəqiqədə “Gent”i qapısına doğru sıxışdırdı. Yerli komandanın qapıçısı bu müddətdə ciddi sınaq qarşısında qalmadı. Və 60-cı dəqiqədə Kastro-Montes bəxtsizliklə üzləşdi. Hüseynovla toqquşmada ciddi zədə alan sağ cinah oyunçusu çox çalışsa da, mübarizəyə davam edə bilmədi. Belədə onu Yulsagerlə əvəzləmək lazım gəldi.

2-ci hissənin ortalarında “Gent” yenə təhlükəli vəziyyət yaratdı, ancaq Kums qapıya dəqiq baş zərbəsi vura bilmədi. Orbanın gücü tükənirdi, Keypers də müdafiəçilərin öhdəsindən gələ bilmirdi. Ümumiyyətlə, “Gent” fasilədən sonra müdafiədən çıxmaqda çətinlik çəkirdi.

Həqiqət anı 78-ci dəqiqədə yetişdi. Ruf topu oyuna daxil edərkən səhvə yol verdi, “Qarabağ” topu ələ keçirdi, Yankoviç uzaq dirək önünə ötürmə verdi. Torunariqa bu oyunda ilk dəfə topu gözdən qaçırdı və Leandro Andrade hesabı açdı. Vanhazebruk dərhal meydana üç yeni futbolçu buraxdı.

Ancaq “Qarabağ” yetkin oynadı və yenə evdə uduzmadı. Zubir hətta 2-ci qolu da vura bilərdi. Cicanın bir zərbəsi tirdən döndü, Ruf uzatma dəqiqələrində də onun fərqlənməsinə imkan vermədi. “Gent” hələ yaşayır, ancaq anlayır ki, gələn həftə bu “Qarabağ”ı keçmək yetərincə çətin olacaq”.