“Hakimin iradı absurddu. Oyun vaxtı ona azarkeşlər tərəfindən heç bir təzyiq olmayıb. Əvvəlcə onu bildirim ki, ədalət təmsilçisi bizim matçdan bir saat əvvəl U-15 liqasının qarşılaşmasını idarə edib. Bizim görüşün 15-ci dəqiqəsindən sonra nəzarəti əldən verdi. Bir tərəfdən fiziki yorğunluğu, digər tərəfdən də rəqib futbolçuların təzyiqi. Əslində stadionda heç çox azarkeş də olmayıb, maksimum 40-50 nəfər var idi. Polislərin sayı azarkeşlərin sayından çox idi. Uniformada olan təxminən 20 polislə yanaşı, 6-7 mülki geyimli əməliyyatçı təhlükəsizliyə nəzarət edirdi. Hakim səhvi hər yerdə olur, bunu anlayışla qarşılayırıq. Ancaq bu hakim 45 dəqiqədə açıq-aşkar rəqibin lehinə qərarlar verirdi. İki yüzfaizlik penaltimizə göz yumdu. Futbolçumuzun dodağını partladırlar, o isə heç nə olmayıbmış kimi oyunu davam etdirir. Hamı gördü ki, rəqibin futbolçusu dirsəklə zərbə vurdu. Məhz belə idarəçiliyə görə azarkeşlərimiz hakimə etirazını bildirib. Ancaq orda hansısa fiziki təmasdan söhbət gedə bilməz”.

“Birinci hissə başa çatandan sonra hakim paltardəyişmə otağına yollandı. Yan xətt hakimlərindən biri, ikinci laysman otağa gedəndə üzünü baş məşqçimizə tutaraq “səni qovduracam” söylədi. Və ardınca baş hakimi çağıraraq baş məşqçimizə qırmızı vərəqə göstərməsini istədi. Ancaq heç nə olmadı. 15 dəqiqədən sonra bizim futbolçular meydana çıxdı, bir qədər gözləsək də, hakimdən səs-soraq çıxmadı. Belədə rayonun Gənclər və İdman İdarəsinin rəisi onların otağına yollandı. Ona deyib ki, azarkeşlər mənə təpik atıblar, həyatıma təhlükə var. İdarə rəisi belə hadisənin olmadığını söyləyib. Ardınca polis naryadının rəisi onların otağına getdi. Hakimə bildirib ki, burda bu qədər polis var. Heç kim artıq-əskik heç nə etməyib. Sən niyə elə düşünürsən ki, həyatın təhlükədədi? Onun dediklərinin də xeyri olmayıb”.

“Stadionda AFFA-nın “Elit məşq” layihəsini izləmək üçün kameralar quraşdırılıb. Bu məsələdə kimin düz, kimin səhv olduğunu üzə çıxarmaq lazımdısa, ondan istifadə oluna bilər”.