“Yevlaxda bizi çətin oyun gözlədiyini bilirdik. Onu da bilirdik ki, hakim Sərxan İsmayılov “Karvan”ın ev oyunlarını idarə edir və onlara daim kömək edir. Matçdan əvvəl ondan tələb etdim ki, rəqib komandanın lisenziyasını yoxla. Hər cür bəhanə ilə bunu etmədi. “Vaxt yoxdu” deyib oyuna başladı. Artıq 1-ci dəqiqədə fubolçumuzu ağır zədələdilər. Yazıq xəstəxanada özünə gəldi. Buna baxmayaraq, onu vuran oyunçuya heç bir xəbərdarlıq olunmadı. Zədələnən futbolçunun əvəzinə meydana çıxanı da “sındırdılar”. Ayağı hələ də gipsdədi. Yenə baş hakimin əli cibinə getmədi. Təsəvvür edin ki, 3-cü dəqiqədə biz artıq iki məcbuiri əvəzetmə etmişdik. Birinci hissədə Sərxan İsmayılov əlindən gələn hər şey etdi ki, bizim komanda mərkəzi keçməsin. Cərimə olur, vermir, tez-tez fit çalmaqla bizim hücumların qarşısını alır. Texniki zonada səsimizi çıxaran kimi də polislər üstümüzə gəlirdi. Bir məqamı deyim, özünüz orda yaşananları təsəvvür edin. Kənarda dayanan polislərdən biri “Karvan”ın oyunçusuna “4 nömrəni vur. Onu qıcıqlandır, qırmızı vərəqə alacaq” deyə göstəriş verirdi. Dözməyib ona yaxınlaşdım. “Yoldaş polis, nə edirsiz? Siz asayişi qorumaq əvəzinə futbolçuları təxribata çəkirsiz. Siz azarkeş deyilsiz. Azarkeş kimi gəlmisizsə, onda formanı əyninizdən çıxarın” demişdim ki, ətrafdakı polisləri də köməyə çağırıb “səni tutub içəri basarıq” cavabını verdi”.

“İkinci hissənin ortalarında hesabda önə çıxdıq. Yeri gəlmişkən, onu da qeyd edim ki, ilk hissə canlı yayınlansa da, sonradan oyunu “yutub”dan sildilər. Ondan sonra azarkeşlər bizim futbolçuları ağır söyüşlərə “qonaq etməyə” başladılar. Onları hardasa başa düşmək olar. Ancaq polislərin daim bizim texniki zonaya təzyiq göstərməsi, ayağa duran kimi başımızın üstünü kəsdirməsi heç bir çərçivəyə sığmırdı. “Karvan”ın texniki zonasında hamı ayaqüstə olduğu halda, bizdə iki nəfər ayağa duran kimi asayiş keçikçiləri əl-qolla yerimizdə oturmağa məcbur edirdi. Hər 5 dəqiqədən bir müxtəlif bəhanə ilə yaxınlaşıb səsimizi çıxarmağa imkan vermirdi. Onların cavab qolu mübahisəli penaltidən vuruldu. Bir neçə dəqiqədən sonra “Karvan” yenə mübahisəli qol vurdu. Həmin an top meydanı tərk etsə də, nədənsə hakim buna göz yummağı lazım bildi. Meydan sahibləri hesabda önə keçən kimi rəqibin azarkeşləri meydana axışdı. Həmin an polisə “azarkeşləri meydandan çıxarın, futbolçularımızı söyürlər”, - deyə iradımı bildirəndə isə qarşı tərəf sinəmdən tutub “siz bizi yorduz” dedi. Bunu görüncə, komandanı meydandan çıxardım. Çünki həmin vaxt təhlükəsizlik təmin olunmamışdı, hər şey ola bilərdi. Hakim isə “niyə çıxırsız, hələ oyunun qutarmasına 7 dəqiqə var” söylədi. Bunu deyən ədalət təmsilçisi biz paltardəyişmə otağına çatmamış matçı bitirdi. Oyundan sonra hakimin otağına gedib görüşü davam etdirməsini istədik. Özü də bilirdi ki, 7 dəqiqə qalıb. Ancaq İsmayılov sözümüzü eşitmədi. Təhlükəsizliyin təmin olunmaması səbəbindən meydandan çıxdığımızı onun diqqətinə çatdırsaq da, “bunun bizə aidiyyatı yoxdu” deyib, oyunu davam etdirməkdən imtina etdi”.

“Oyundan dərhal sonra Region Liqasının keçirilməsinə cavabdeh şəxslərlə əlaqə saxladım. Mənə “videogörüntü yoxdusa, heç nə edə bilmərik” cavabını verdilər. Ev oyunlarımız çəkilir. Ancaq hələ ki səfər matçlarını çəkə bilmirik. Qarşı tərəf ilk yarının da görüntülərini, qeyd etdiyim kimi, dərhal “yutub”dan sildi. Bu səbəbdən əlimizdə sübut olmadı. Ancaq Yevlax rayon Polis İdarəsinə əməkdaşlarının özbaşınalığı ilə bağlı məlumat verdik”.