Avropa Liqasında qrup mərhələsinə yekun vurulur.

"Qarabağ" evdə "Frayburq"la bərabərə qalıb - 1:1. Oyundan sonra qonaqların çalışdırıcısı Kristian Ştrayxın mətbuat konfransı keçirilib. Sizi mütəxəssisin fikirləri ilə tanış edirik:

- Sizcə, bu “Qarabağ” Konfrans Liqasında nə qədər irəli gedə bilər?
- “Qarabağ”ın Avropa Liqasındakı bütün oyunlarını izləmişəm. Pley-offa çıxmamaları bəxtsizliklə bağlıdı. Bu oyunla çox irəli gedə bilər. “Qarabağ”dan çox şey gözləmək olar. “Qarabağ”ın Avropa Liqasında pley-offa çıxmaması sadəcə bəxtsizlikdi.

- Almaniyadakı ilk oyundan əvvəl və sonra da “Qarabağ”ı tərifləmişdiz. Səfərdən öncə isə Azərbaycan və Bakı barədə xoş sözlər səsləndirmişdiz. Bu sevginiz nədən qaynaqlanır?
- “Qarabağ”la üzləşməzdən öncə Azərbaycanı tanımırdım. Komandamın oynadığı hücumameyilli futbol diqqətimi çəkmişdi. Püşkatmadan əvvəl xəbərim yox idi. Ondan sonra oyunlara baxdım. “Qarabağ”ın oynadığı futboldan həzz alırdım. Bu, oyun stilinə olan simpatiyamdı.

- Sizcə, Avropa Liqasının pley-offuna “Qarabağ”, yoxsa “Nant” daha çox layiq idi?
- Futbolda bəxt amili də rol oynayır. “Nant”a qarşı da oynamışıq. Kimin xalı çoxdusa, o da növbəti mərhələyə çıxır. Daha əvvəl də dedim ki, bu gün xal qazandığımız üçün bəxtimiz gətirdi. Ancaq fakt odur ki, yekunda “Nant”ın xalı daha çox oldu.

- “Qarabağ”da hansı futbolçular diqqətinizi cəlb etdi? Kimisə komandanızda görmək istəyərsiz?
- Vaxtım olsa, “Qarabağ”ı Konfrans Liqasında izləyəcəm. Möhtəşəm baş məşqçi Qurban Qurbanovun işi mənə çox maraqlıdı. O, 2008-ci ildən burada çalışır. Oyunlardan sonra başa düşdüm ki, niyə uzun müddətdi, bu komandadadı. Hazırda kifayət qədər oyunçumuz var. Həddən çox futbolçunu komandaya cəlb edə bilmərəm. Kadi, Ovusu və Zubir çox güclü oyunçulardı. Komandada sağlam ab-hava var. Oyunlardan əvvəl izləyəndə görürdüm ki, “Qarabağ” hər qol vuranda ehtiyat oyunçular, məşqçilər heyəti – hamı sevinirdi. Bu göstərir ki, komandada hər şey çox yaxşıdı. Bu, mənim üçün vacib amildi.

- İlk oyundan sonra da Qurban Qurbanovla danışmışdız. Bu gün də matçdan əvvəlk söhbətiniz oldu. Onunla nələr danışdız?
- Səmimi və dost kimi danışdıq. Biz həmkarıq. İlk oyundan sonra mənə müsbət emosiya ilə yanaşmışdı. Mən uduzsaydım, inanmıram ki, belə danışa bilərdim. Bəlkə, final fitindən sonra birbaşa paltardəyişmə otağına yollanardım.

- Ötən ili çıxsaq, “Qarabağ”la qarşılaşan komandalar adətən finala qədər gedir, ya da çempion olurlar. Bu dəfə turnirdə güclü kollektivlər var. Öz komandanızdan belə gözləntiniz var?
- Bizim üçün çox maraqlı turnirdi. Rəqibləri də görəndə matçları daha həvəslə gözləyirsən. Oyundan oyuna fikirləşirik. Bundesliqada da işlərimiz yaxşı gedir. Komandam çox yaxşı futbol göstərir. Nə olacağını görəcəyik. Çox irəli baxmaq istəmirəm. Qonaqpərvərliyə görə Azərbaycana minnətdarlığımızı bildiririk. “Qarabağ”a uğurlar arzulayırıq. İnanıram ki, belə futbolla çox yaxşı nəticələr əldə edə biləcəklər.