Final

Real - Əl-Hilal 5:3 (2:1)
Real (İspaniya, Avropa): Lunin, Karvaxal (Valyexo, 79), Rüdiger, Alaba, Kamavinqa, Çuameni (Sebalyos, 62), Kroos (Naço, 74), Modriç (Asensio, 74), Valverde, Benzema (Rodriqo, 62), Vinisius.
Əl-Hilal (Səudiyyə Ərəbistanı, Asiya): Əl-Muayuf, Əbdülhəmid, Çjan Hyun Su, Əl-Bulayhi, X.Əl-Davsari, Kanno, Kuelyar, Karrilyo (Mişael, 75), Vyetto (Əl-Hamdan, 86), S.Əl-Davsari (N.Əl-Davsari, 75), Mareqa (İqalo, 86).
Qollar: Vinisius, 13 (1:0). Valverde, 18 (2:0). Mareqa, 26 (2:1). Benzema, 54 (3:1). Valverde, 58 (4:1). Vyetto, 63 (4:2). Vinisius, 69 (5:2). Vyetto, 79 (5:3).
Vərəqə: yoxdu.
Hakim: Entoni Teylor (İngiltərə).
11 fevral. Rabat. 44439 tamaşaçı.

Mərakeşdə keçirilən Klublararası Dünya Çempionatına (KDÇ) fevralın 11-də yekun vuruldu. Rabat şəhərində keçirilən finalda gözlənilən nəticə qeydə alındı. “Real” turnirə çoxsaylı itkilərlə başlasa da, əvvəlcə həlledici oyuna vəsiqə qazandı, şənbə günü isə “Əl-Hilal”ı məğlub edərək turnirdə növbəti uğurunu reallaşdırdı.
UEFA Çempionlar Liqasının (ÇL) son qalibi favorit statusunu doğrultdu. Səudiyyə Ərəbistanının KDÇ-nin finalına vəsiqə qazanan ilk təmsilçisi kimi tarixə düşən “Əl-Hilal” adlı-sanlı və titullu rəqibinə bacardığı qədər müqavimət göstərdi. Final oyunu futbol festivalını xatırlatdı. Açıq oyuna üstünlük verən tərəflər üçü ilk yarıda olmaqla ümumilikdə 8 qol vurdular. İlk 18 dəqiqədə iki qol vuran madridlilərin bir qədər sakitləşməsi rəqibin fərqi minimuma endirməsinə şərait yaratdı. Ancaq fasilədən sonra ərəblərin qapısına 4 dəqiqəyə iki dəfə yol tapan “Real” səviyyəsini bir daha sübut etdi. Bundan sonra “Əl-Hilal” əks-hücumda ikinci qolu da vurdu. Lakin matçın ən yaxşı oyunçusu olan Vinisius az sonra komandasının 5-ci qolunu vurmaqla praktiki olaraq qalibin kimliyinə şübhə yeri qoymadı. Qalan vaxtda Asiya çempionunun gücü fərqi iki topa endirməyə çatdı. 5:3 hesablı qələbə klubların mundialında “Real”ın növbəti uğrunun göstəricisi oldu.
Vinisus 3 qol vurduğu turnirin ən yaxşı oyunçusu kimi “Qızıl top”a layiq görüldü. Onun oyundaşı Valverde “Gümüş top”, “Əl-Hilal”ın hücumçusu Vyetto isə “Bürünc top” qazandı.

3-cü yer uğrunda oyun

Əl-Əhli - Flamenqo 2:4
Radvan, 38; 60 - Qabriel Barboza, 11-p.; 85-p. Pedro, 77; 90+1.
Əl-Əhli (Misir, Afrika): Əl-Şenavi, Maalul (Əl-Şahat, 90), İbrahim, Abdelmonem, Fəthi (Dyenq, 90), Fəttah, Attya, Radvan, Tau, Məhəmməd, Şerif (Hani, 75).
Flamenqo (Braziliya, Cənubi Amerika): Santos, David Luis (Pablo, 87), Varela, Ayrton Lukas, Fabrisio Bruno, Everton Ribeyro (Everton, 63), Vidal, De Arraskaeta (Pulqar, 90+8), Tyaqo Maya, Pedro (Mateus França, 90+8), Qabriel Barboza.

Tanjer şəhərində keçirilən 3-cü yer uğrunda oyun da məhsuldar alındı. “Flamenqo” favorit statusunu 4:2 hesablı qələbə ilə doğrultdu. Maraqlıdı ki, 6 qol hərəyə dubl edən Radvan, Qabriel Barboza və Pedronun hesabına yazıldı. “Əl-Əhli”nin müdafiəçisi Maalulun 58-ci dəqiqədə penaltidən yararlana bilmədiyini və misirlilərin yarımmüdafiəçisi Fəttahın 69-cu dəqiqədə birbaşa qırmızı vərəqə aldığını da qeyd edək.

Faktlar

* “Real” KDÇ-də 5-ci dəfə uğur qazanmaqla özünün sahibi olduğu rekordu yenilədi. Madrid klubu turnirdə bundan əvvəl 2014-cü və 2016-18-ci illər aralığında qalib gəlib. “Barselona” 3, “Korintians” və “Bavariya” isə hərəyə 2 dəfə çempion olub.
* KDÇ ardıcıl 10-cu dəfə Avropa komandasının qələbəsi ilə nəticələndi. “Köhnə qitə”nin bu yarışdakı sonuncu uğursuzu 2012-ci ildə finalda “Korintians”a uduzan (0:1) “Çelsi” olub. Mundialda Avropanın hesabında 15, Cənubi Amerikanın hesabında isə 4 qələbə var.
* “Real” əzəli rəqibi “Barselona”nı (98) arxada qoyaraq bütün turnirlərdə 99-cu uğurunu qazandı. Madridlilərin hesabında 68 milli, 31 beynəlxalq titul var. “Barselona”da bu planda göstəricilər uyğun olaraq 76-ya və 22-yə bərabərdi.
* Ançelotti məşqçilik karyerasında 25-ci titulunu qazandı. İtaliyalı mütəxəssis bu uğurların 9-na “Real”ın baş məşqçisi kimi nail olub. Onun “Milan”la 8, “Çelsi” və “Bavariya” ilə 3, “Yuventus” və PSJ ilə 1 tutul qazandığını da qeyd edək.
* Kroos KDÇ-də 6-cı dəfə uğur qazanmaqla özünün sahibi olduğu rekordu yenilədi. 33 yaşlı almaniyalı yarımmüdafiəçi turnirdə bundan əvvəl “Real”la 2014-cü və 2016-18-ci illər aralığında, “Bavariya” ilə 2013-cü ildə qalib gəlib.
* “Real” Florentino Peresin prezidentliyi dövründə 31-ci titulunu qazandı. İspaniya klubunda ən çox uğura nail olan prezident Santyaqo Bernabeudu (32).
* Benzema “Real”ın formasında 24-cü titulunu qazandı. Fransalı hücumçu indi klubun rekordçusu olan braziliyalı Marselodan yalnız bir titul qədər geri qalır.

Oyundan sonra

Karlo Ançelotti, “Real”ın baş məşqçisi:

“Xoşbəxtik. “Real” 8-ci dəfə (komanda daha 3 dəfə Qitələrarası kubokun qalibi olub – red.) dünya çempionu oldu. Yaxşı oyun idi. Hücumameyilli oyunçular ustalıq nümayiş etdirdilər. Vinisius, Benzema və Valverde çox yaxşı oynadılar, vərdiş və keyfiyyətlərini göstərdilər. Burdakı gələcəyim necə olacaq? Məni qovmayınca heç yana getməyəcəyəm”.