Xerard 600 min avrodan çox məbləğdə rüşvət verməkdə şübhəli bilinir.

“El Economista” nəşrinin yazdığına görə, İspaniyanın Vergi Agentliyi onun hesabından şübhəli köçürmə faktını araşdırır. Bu əməliyyat İspaniya Superkuboku matçlarının Səudiyyə Ərəbistanında təşkili ilə bağlı Pikeyə məxsus “Kosmos Football” şirkəti ilə müqavilənin imzalanmasından sonra reallaşıb. O, naməlum hesaba 669649 avro köçürüb, bu məbləği vergi kimi göstərib. Bu transfer İspaniyanın müvafiq qurumu tərəfindən qeydə alınmayıb, Pikenin 2019-cu ilin iyulundan 2022-ci ilin aprelinə qədərki dövrdə ödədiyi vergilərin məbləği isə xəzinənin bəyan etdiyi məlumatla üst-üstə düşmür.

Onu da qeyd edək ki, bir müddət əvvəl Beynəlxalq Tennis Federasiyasının (BTF) sabiq futbolçu və “Kosmos Football” şirkətinə qarşı məhkəmədə iddia qaldıracağı haqda məlumat yayılmışdı. Buna tərəflər arasındakı müqavilənin birtərəfli şəkildə pozulmasının səbəb olduğu bildirilmişdi. Xəbərdə BTF rəhbərliyinin Pike və şirkətindən təzminat almağı planlaşdırdığı qeyd edilmişdi. İspaniya yığması ilə dünya və Avropa çempionu olan Xerardın BTF ilə Devis Kuboku üzrə müqaviləni qüvvədən saldığını da xatırladaq.