Belə görünür, məhşur müdafiəçi Xerar Pikenin həyatındakı qara zolaq hələ bir müddət də davam edəcək.

Məlum olduğu kimi bu yaxınlarda xəyanətdə yaxalanan təcrübəli futbolçu 10 ildən artıqdı birlikdə olduğu 2 uşağının anası, dünyaca ünlü müğənni Şakiradan ayrılmalı olmuşdu. Deyəsən, Pike Şakiradan sonra indi də ''Barselona''nın baş məşqçisi Xavi Ernandesə lazım deyil. Bu xəbəri İspaniyanın ''Mundo Deportivo'' nəşri yayıb. Xəbərdə qeyd olunur ki, kataloniyalı çalışdırıcı yüksək məvacibi, tez-tez zədələnməsi və şəxsi həyatındakı intizamsızlıq üzündən Pikeni klubdan kənarlaşdırmaq qərarına gəlib. O hətta bu barədə Pikenin özünə də məlumat verib. Həqiqətən də 35 yaşlı futbolçunun son dönəmlərdə performansı çox aşağı düşüb. Diqqətini futboldan kənar şeylərə, xüsusən də ticarətə yönəldən Pikenin fiziki forması da ürəkaçan deyil. Amma digər tərəfdən ''Barselona''nın bu futbolçuya ümumilikdə 40 milyon avro borcunun olduğu da deyilir. Hərçənd rəhbərlik ümid edir ki, 2014-də klubun digər əfsanəsi Karles Puyol ayrılarkən klubun ona olan borcunun böyük hissəsindən imtina etdiyi kimi Pike də bu cür addım atacaq. Qeyd edək ki, ''Barsa''nın öz yetirməsi olan bu futbolçu klubda indiyə qədər 602 rəsmi oyun keçirib və 3 ÇL, 8 ölkə çempionluğu olmaqla 30 titul qazanıb.