Misli premyer-liqasında 22-ci turun oyunları keçirilir.

"Səbail" "Zirə"ni məğlub edib - 2:0. Görüşdən sonra qəsəbə təmsilçisinin çalışdırıcısı Rəşad Sadıqovun mətbuat konfransı keçirilib. Sizi mütəxəssisin fikirləri ilə tanış edirik:

- Bu gün pis oynayıb məğlub oldunuz?
- Bərabər səviyyəli oyun gedirdi. Bu, mənə kifayət etmirdi. Bu gün yaxşı oynadıq deyə bilmərəm. Daha üstün, dominant oynamağa çalışdıq. Rəqib buna imkan vermədi. "Səbail"ə imkan verdik ki, pressinqi effektiv olsun. Top itkilərimiz oldu. Komandadan daha yaxşı oyun gözləyirdim.

- Şahin Diniyevin futbolçusu olmusuz. Baş məşqçi kimi ilk dəfə üz-üzə gəldiniz. Şahin Diniyevi yaxşı analiz edə bilmədiniz?
- Fərqli "Səbail" var idi qarşımızıda. Əvvəlkilərlə inidiki oyun arasında fərq çox idi. Bilirdim ki, qarşımızda fərqli komanda olacaq. Rəqib bizimlə oyuna xüsusi motivasiya ilə çıxacaq. Bilirdim ki, rəqibdə boşluqlar olmayacaq. Şahin müəllim oyuna yaxşı hazırlamışdı komandanı. Gedişat pis olanda da, komandasını oyuna yaxşı hazırlaya bilir. Səhv etmirəmsə, "Səbail"ə ilk məğlubiyyətimizdi. Qalib gəlmək istəyirdik. "Neftçi" də "Qəbələ" ilə heç-heçə etmişdi. Şansımız var idi ki, üçüncü yerə yaxınlaşaq. Təəssüf ki, bunu qaçırdıq.

- Sosial şəbəkələrdə nəticələrinizə görə narazılıqlar var. Təzyiqə davam gətirəcəksiz?
- Mən eşitməmişəm tənqidləri. Sosial şəbəkələri oxumağa vaxt olmur. "Neftçi" və "Qəbələ"yə qarşı yaxşı oynadıq. Futbolu bilən insanlar müsbət fikirlər səsləndirdi. Bu gün həmin komandanı görə bilmədik. Süni meydanda oynayırdıq, rəqib sonuncu pillədə idi. Bu cür rəqiblə oynamaq çətindi. Çünki, ölümünə oynayırlar. "Səbail" də belədi. Yolumuza davam edirik. Narazı qalacaq bir şey yoxdu. Potensial olaraq layiqli yerimizdəyik. "Neftçi", "Sabah" bütün komandalardan fərqlənirlər. Dördüncü yer bizim üçün pis nəticə deyil.

- Hədəf dördüncü yerdə qalmaqdı?
- Üçüncülük uğrunda mübarizə aparmaqdı. Hədəf çox ola bilər, amma gedişatdan çox şey asılıdı. Çox çətin qələbələr qazanırıq. İmkanlarımız çox olur, fərqlənə bilmirik. Qapımızdan isə kobud şəkildə qollar buraxırıq. Görməmişəm ki, pis oynayıb qalib gələk. Hər oyun da yaxşı oynamaq alınmır. Çox hadisələr baş verir oyunlarımızda. Amma səbr etməliyik. İşləmək lazımdı.

- Mərkəz müdafiəçisi sıxıntınız var?
- Təbii ki, sıxıntılar var. Bu günün yox, uzun müddətin problemidi. Axtarıram. Tapmışdım, gətirə bilmədim. O mövqeyi gücləndirməliyik.

- Eldar Quliyevin transferi barədə fikriniz necədi?
- Eldarı bir ilə yaxındı komandamda görmək istəyirdim. Bu transfer dönəmində razılaşdıq. Proses uzun çəkdi. Danışıqlar erkən bitsəydi, oyunlarda artıq iştirak edərdi. Bir-iki gündü ki, komandaya qoşulub. Gəncdir. Amma risk edə bilmərik. Son rəsmi oyununu noyabrda oynayıb. Müəyyən fərdi məşqlər edir. Formaya salmağa çalışacağıq. Vladislav Kulaçın zədələnməsi məyusedicidi. Həmin futbolçular da komandaya qatılandan sonra keyfiyyətmiz artacaq.

- Mayda müqavilənizin müddətini uzadacaqsız?
- Həm bu günə, həm gələcəyə yönəlik transferlərdi. "Zirə"də qalacam, ya yox, fərqi yoxdu. Burda olduğum vaxtda işimi layiqincə yerinə yetirirəm. Maya qədər vaxtımız var. Onda vəziyyəti təhlil edib qərar qəbul edəcəyik.