“Formula-1” komandalarından “Aston Martin” inanclara həvəs göstərmir. Göstərsəydi, yeni maşınının təqdimat mərasimini fevralın 13-nə salmazdı.

Football-plus.az xəbər verir ki, Silverstoun komandasının rəhbəri Mayk Krak İspaniyanın AS qəzetinə verdiyi müsahibədə Fernando Alonsonun gəlişi ilə bağlı gözləntilərini bölüşüb.

- Təsəvvür edək ki, indi 2022-ci ilin iyuludu və siz hələ də karyerasının növbəti mərhələsi ilə bağlı qərar verməyən pilotla danışıq aparırsız. Onu yaşıl maşının bütün başqa rəngli maşınlardan daha yaxşı olduğuna necə inandırardız?

- Pis başlamadız! Bunu Fernandodan soruşmaq lazımdı. Yaşıl rəng ümumi fonda seçilir, ona görə ki, inkişaf edirik, ən ciddi ambisiyalarımız var. Özü də bu boş söz deyil. Axı biz yeni baza tikirik, bir çox yeni mütəxəssis dəvət etmişik. İndi layihəmizin bütün hissələrinin mükəmməl işinə nail olmaq lazımdı.

- Demək olar ki, bütün komandalar qələbə qazanmağa ümid etdiyini deyir – kimi 3, kimi 5 ildən sonra. Niyə məhz “Aston Martin”ə bel bağlamaq lazımdı?

- Ona görə ki, biz işə daha ciddi yanaşırıq, ambisiyalarımızın əsası var. Heç bir başqa komanda qarşıya qoyulan vəzifəni yerinə yetirmək üçün belə böyük pul qoymur. Hə, elə komandalar var ki, üç ildən və ya 100 yarışdan sonra qələbə qazanmağa başlayacaqlarını deyirlər, ancaq onlar bunun üçün nə edirlər? Bizdə isə hər şey yeni olacaq: baza, aerodinamik boru, simulyatorlar. Ən ciddi niyyətlərimiz var və Fernando bunu çox tez anladı. Əslində heç onu dilə tutmaq lazım gəlmədi, ona görə ki, artıq hər şeyi bilirdi. Onun hər yerdə adamları var.

Bir sözlə, bizə inanmaq olar, axı biz yalnız danışmırıq, iş də görürük.

- Hələ ki əsas uğurunuz Alonso ilə müqavilədi. Sizə elə gəlmir ki, trassdakı nəticələrə yox, məhz Alonso ilə müqaviləyə görə medianın diqqət mərkəzində olmaq riski ilə üz-üzəsiz?

- Məhz elə bundan qaçmaq istəyirik. Ancaq hətta Fernando ilə müqavilə imzalayanda da gəlişigözəl sözlər demədik. Biz heç vaxt demədik ki, dərhal yarışları qazanacağıq, çempion olacağıq. Tədricən tərəqqi etməyə çalışırıq ki, bir neçə ildən sonra yüksək səviyyəyə qalxaq. Və heç vaxt söz verməmişik ki, məhz Fernandonun sayəsində uğur qazanacağıq. Biz onun sərəncamına sürətli maşın verməli və düzgün şərait yaratmalıyıq.

- Necə düşünürsüz, Fernando real şəkildə hansı nəticəyə ümid edə bilər?

- Əsas vəzifə Fernando üçün bütün potensialından yararlanmağa imkan verən maşın yaratmaqdı. Buna nail olsaq, o, yüksək nəticələr göstərə bilər. Elə etməyə çalışırıq ki, ispaniyalı, britaniyalı, “Aston Martin” brendinin bütün dünyada olan azarkeşləri razı qalsın. “Formula-1”də effektli maşınınızın olması çox vacibdi, ancaq onu yarada bilmisizsə, sizə yaxşı pilotlar da lazımdı. İstəyirik ki, bizdə hər ikisi olsun. Çox və yorulmadan çalışmalıyıq, ancaq əminik ki, Fernando komandaya əla motivasiya verə bilər. Komandadakı hər kəs onun haqq etdiyi maşını yaratmağı çox istəyir.

- Artıq Sebastyan Fettel komandanızda olub. Niyə elə düşünürsüz ki, Alonsonun gəlişi ilə irəli doğru daha bir addım ata biləcəksiz?

- Yaxşı sualdı. Sebastyan dördqat dünya çempionudu, ancaq o fərqli adamdı və karyerasını bitirməyə qərar verdi. Fernando isə “Formula-1”də qalmaq istədi və bu məqam komandanın motivasiyasını dəyişir. Komandanın inkişafında müəyyən dinamika qorunur, Sebastyana bizim üçün etdiklərinə görə minnətdarıq, axı o komandanı yeni səviyyəyə qaldıra bildi. Ancaq indi yatırımın və Fernandonun qələbəyə can atmasının sayəsində daha tez tərəqqi edə bilərik.

- Fernando ilə əvvəldən tanış idiz?

- Yox. Onun haqda yalnız yaxşı sözlər eşidirdim (gülür). Ancaq mən yalnız öz təcrübəmə söykənməyə üstünlük verirəm. Fernando ilə aramızda hansısa problemin yaranacağını gözləmirəm. Əlbəttə, onunla münasibətlərdə dürüst olsaq və sərəncamına sürətli maşın versək!

- Çox güman, Alonsonun “Formula-1” karyerası o qədər də uzun sürməyəcək, axı elə də cavan deyil. Onun mümkün perspektivləri “Aston Martin”in planları ilə üst-üstə düşürmü?

- Düşünürəm ki, bəli. Deyirsiz ki, Fernandonun “Formula-1” karyerasının sonuna o qədər də çox qalmayıb. Ancaq onun sizinlə razılaşacağına əmin deyiləm. Belə yüksək motivasiya, məqsədyönlülük, gözəl fiziki və psixoloji hazırlıq, istedad və təcrübə ilə seçilən pilotla çalışırsızsa, düşünmürəm ki, onun karyerasının qürub çağıdı. Nümunə kimi Valentino Rossinin karyerasını göstərə bilərəm.