“Mançester Yunayted”in potensial alıcıları sırasına biri də qoşulub. Adı açıqlanmayan və Qətərdən olan bir sərmayədar şirkət klubu almaq niyyətindədi.

Football-plus.az “Daily Mail”ə istinadən xəbər verir ki, həmin şirkət artıq MY üçün 6 milyard funt sterlinq təklif göndərib.

Ərəblər klubun sahibi olan Qleyzer ailəsinin bu təklifi müsbət cavablayacağına əmindilər.

Xatırladaq ki, bir müddət əvvəl “Qatar Sports Investments” şirkətinin klubu almaq planı haqda xəbər yayılmışdı. Lakin bu şirkətin PSJ kimi daha bir böyük kluba sahib olması qətərliləri bu fikirdən daşındırmışdı.

Qleyzer ailəsi ötən ilin dekabrında MY-ni satmaq niyyətini bəyan edib. Böyük Britaniya mənbələri amerikalı biznesmenlərin klubla azı 8 milyard funt sterlinq əvəzində vidalaşmağa hazır olduqlarını vurğulayır.