“Mançester Yunayted”in mümkün satışı ilə bağlı ehtimal yenidən ortaya çıxıb. Bunu “Daily Star” qəzeti iddia edir.

Football-plus.az xəbər verir ki, klubun sahibi olan Qleyzerlər ailəsinin bununla bağlı fikri öyrənilib. Coel və Avraam Qleyzer qardaşları 10 milyard dollarlıq təklif alacaqları halda klubun mümkün satışı ilə bağlı danışıqlara başlayacaqlarını bildiriblər.

“Daily Star”ın məlumatına görə, amerikalı həmsahiblər Aleks Ferqyusonun 2013-cü ildə baş məşqçi vəzifəsindən getməsindən sonra komandanın ciddi uğur qazanmamasına baxmayaraq, klubu satmaq istəmirlər. Lakin onlar 10 milyard dollarlıq təklif alacaqları halda müştərilərlə danışıqlara başlayacaqlar.

Qleyzerlərə belə fantastik təklif edilərsə və satış baş tutarsa, “Yunayted” dünyanın ən dəyərli idman klubu olacaq. Yeri gəlmişkən, bu planda rekord 8 milyard dollar dəyərində qiymətləndirilən NFL klubu “Dallas Kovboys”du. Qleyzerlər ailəsinin 2005-ci ildə MY-ni təxminən 800 milyon dollara aldığını da xatırladaq.