MS sanksiyaya məruz qala, Qvardiola isə komandadan gedə bilər – TƏHLİL
Deyəsən, İtaliyadan sonra İngiltərə futbolunda da böyük qalmaqal yetişib. İngiltərə Premyer-Liqası (İPL) “Mançester Siti”ni çoxsaylı maliyyə pozuntusunda ittiham edib.
Bu məlumatı “The Times” qəzetinin jurnalisti Martin Siqler yayıb. O, şəxsi “tvitter” səhifəsində İPL-in dörd il çəkən araşdırmanı başa vurduğunu bildirib. Təhqiqat nəticəsində MS rəhbərliyinin “maliyyə feyr-pleyi” planında çox sayda qayda pozuntusuna yol verdiyi məlum olub. Siqler bununla bağlı siyahı da dərc edib. İddiaya görə, MS 2009/10 mövsümündən 2017/18 mövsümünə qədər “maliyyə feyr-pleyi” qaydalarını pozub. İttihamlar rəsmən təsdiqlənəcəyi halda İngiltərənin son çempionunun xalların silinməsi də daxil olmaqla bir sıra başqa cəzalara məruz qalacağı istisna edilmir.
Klubun bu ittihamla bağlı yaydığı bəyanatda belə deyilir:
“Mançester Siti” Premyer-Liqanın qaydalarının pozulması ilə bağlı bu iddiaların yayılmasına görə təəccüblənir. Klub mövqeyimizi dəstəkləyən çoxlu təkzibedilməz sübutun qərəzsiz şəkildə araşdırılması məqsədi ilə müstəqil komissiya tərəfindən bu məsələyə baxılmasını alqışlayır. Buna görə də ümid edirik ki, bu məsələ birdəfəlik bağlanacaq”.
Siqlerin bildirdiyinə görə, MS İPL-in mümkün sanksiyalarından İdman Arbitraj Məhkəməsinə (İAM) şikayət edə bilməyəcək. Liqanın qaydalarında hər hansı sanksiyaya görə klubların İsveçrənin Lozanna şəhərindəki instansiyaya müraciət edə bilməyəcəyi aydın göstərilib.
Məsələyə Xosep Qvardiolanın reaksiyası daha cəlbedici olub. İspaniyalı mütəxəssis klubun ona “maliyyə feyr-pleyi” qaydalarının pozulmaması ilə bağlı yalan məlumat verdiyi təsdiqlənəcəyi halda baş məşqçi vəzifəsini tərk edəcək. “The Mirror” qəzeti komandanı 2016-cı ildən çalışdıran Qvardiolanın açıqlamasını yayıb:
“Bizim rəhbərliyə “mənə şübhəli məqamlarla bağlı məlumat verin” demişəm. Onlara burda işlədiyim ilk gündən 100 faiz inanmışam. Buna görə klubu bu məqamda müdafiə etmişəm. Bosslara “məni aldatsaz, ertəsi gün burda olmayacağam. Komandadan gedəcəm və siz bundan sonra mənim dostlarım olmayacaqsız” demişəm. Bütün işləri qaydalar çərçivəsində görən klubu təmsil etmək xoşuma gəlir. Əvvəl-axır söhbət Çempionlar Liqasında və ya premyer-liqada qələbədən getmir. Məsələ azarkeşlərimiz üçün daim yaxşı işlər görməklə bağlıdı”.
Digər xəbərlər
