Şahin Diniyev: "Bu, gələcəyə nikbin baxmağa imkan verir"
Misli premyer-liqasında 21-ci tura yekun vurulub.
"Sabah" "Səbail"i məğlub edib - 4:0. Oyundan sonra "dənizçilər"in çalışdırıcısı Şahin Diniyevin mətbuat konfransı keçirilib. Sizi mütəxəssisin fikirləri ilə tanış edirik:
"Belə hesabdan sonra danışmaq çətindi. Psixoloji gərginliyi üzərimizdən ata bilmirdik. Rahat oynaya bilmirik. Futbolçular təzyiq altındadı. Matçın əvvəlində fərdi səhvlərdən qol buraxdıq. Belə komandaya qarşı geridönüş etmək çətindi. "Sabah" hazırda Azərbaycanda ən yaxşı futbol sərgiləyən komandalardan biridi, bəlkə də, birincisi. Erkən qollar buraxdıq. Fasilədə futbolçularla danışdıq və dedim ki, oynamaq lazımdır. İkinci hissədə istədiyim futbolu görə bildim. Bu, gələcəyə nikbin baxmağa imkan verir. Belə oynaya bilsək, qarşıdakı oyunlarda yaxşı nəticə əldə edə bilərik".
- Rahid Əmirquliyevin qırmızı vərəqə aldığı epizodla bağlı fikirləriniz nədi?
- Rahid sakit futbolçudu. Ehtiyatsızlıqdan qırmızı vərəqə aldı. İki oyunçunun da mübarizəsi var idi. İstəmədən belə bir qayda pozuntusu etdi.
- "Qarabağ"ın xal itirməsindən sonra "Sabah"ın aqressiv oynayacağı bəlli idi. Bunun qarşısını almaq haqda düşünürdüz?
- İlk dəqiqələrdə sadə və müdafiədə etibarlı oynamaq istəyirdik. Rəqibin təzyiqinin qarşısını almağı düşünürdük. Erkən qollarda fərdi səhvlərimiz oldu. Özümüz özümüzə iki qol vurduq. Heyətdə 6 itki var. Bu zaman dəyişikliklər etmək də çətin olur. Bu vəziyyətdə geridönüş etmək çətindi. Yaradıcı oyunçu tapa bilmədim ki, irəlidə geridönüş yarada bilsin.
- Premyer-liqada sonuncu yeri tutan elitanı tərk edəcək. Bu, komandanın üzərində təzyiq yaratmır?
- Oyunumuzdan çox şey asılıdı. Bu gün fasilədən sonra yaxşı oynadıq. Belə davam etsək, yaxşı nəticələr əldə edə bilərik.
- İtirilən xallardan sonra elitada qalmaq çətin olmayacaq?
- Komanda uzun müddət qələbə qazanmayıb. Bu gərginlik var. Zədəlilərimizin qayıtması komandanı daha güclü edəcək. Qısa zamandı birlikdəyik. Tez bir zamanda hər şeyi aşılamaq çətindi. Boşluqlarımız var, onları doldura bilmirik. Legioner gətirib, yalandan otuzdurmaq da düzgün deyil. Hücumda yaradıcılıq çatışmır. Qış transfer dönəmində yaxşı futbolçu gətirmək çətindi. Son günə qədər çalışacağıq. Bir mövqe var ki, məni çox narahat edir. Son günlərdi, həll etməyə çalışacağıq.
- David Qomisin çıxışından razısız?
- Hələ tam hazır deyil. Sürəti, driblinqi var. Bu cəhətlərindən razıyam. Onu transfer etməklə düzgün seçim etmişik. Ümidlərimizi doğruldu.
- Futbolçuların ölkə kubokuna daha çox diqqət yetirdiyini düşünmürsüz?
- Bizim A planımız çempionatda qalmaqdı. Elitanı tərk edib, kuboku qazanacağıqsa, kubokdan imtina edərəm. Həm kuboka, həm çempionata eyni tərz yanaşacağıq.
- Müdafiə xəttində gənclərə şans verməyi düşünürsüz?
- Məşqlərə görə heyət seçirəm. Üstün olan meydana çıxır. Hazırda əsas heyətdə olanlar deməli oynamağa layiqdirlər və start heyətdədilər. Məşq prosesinə baxıb, qərar verirəm. Bu gün üç müdafiəçi ilə oyanamağı düşünürdüm, amma qorxduq. Anidən taktikanı dəyişmək istəmədim.
- Mahmud Qurbanovun vaxtında "Sabah"ın hər iki oyunda uduzması bu gün onlara əlavə motivasiya vermədi?
- Bu gün rəqib daha ciddi yanaşdı. Əlavə motivasiya və aqressiya ilə oynadılar. Oyunda gördüklərim bunu deməyə əsas verir. Keçmiş keçmişdə qaldı. Hardan xal götürmək lazım olduğunu bilirəm.
- Komandanızın son sıralarda yer alması sırf nəticəyə oynamağınıza səbəb olur?
- Futbol iki hissəyə bölünür. Bizim ehtiyatımız çox zəif idi. Ötən oyun "Kəpəz" bizdən yaxşı oynadı, amma qələbə qazandıq. Sual versələr ki, gözəl oyun, ya nəticə? Nəticəni seçərdim.
