Avstraliya Açıq Tennis Çempionatının yekunlarını nəzərinizə çatdırmışdıq. Xatırladaq ki, kişilər arasında turnirin finalında Stefanos Sisipası məğlub edən Novak Cokoviş karyerasında 93-cü qəniməti qazanmaqla yalnız İvan Lendl (94), Rocer Federer (103) və Cimmi Konnorsdan (109) geri qalır.

Football-plus.az xəbər verir ki, “Böyük dəbilqə” turnirlərində 22-ci dəfə qalib gələn serb tennisçinin məşqçisi Qoran İvanişeviç onunla Rafael Nadalın rəqabətindən danışıb:

“8-9 il əvvəl deyirdim ki, Novakla Rafa Rocer Federeri arxada qoyacaq. Onda onlar geri qalırdılar, adamlar mənə qəribə baxırdılar. İndi isə bizdə hesab 22:22-di. Cokoviçlə Nadal iki qeyri-adi, tennis üçün çox iş görən rəqibdi. “Rolan Qarros”u səbirsizliklə gözləyirəm. Düzünə qalsa, çox istəyirəm ki, onlar ikisi də sağlam olsun, onda savaş başlayacaq. Boşluq axtaracaq, nəsə etməyə çalışacaq gənclər də olacaq. Ancaq məhz Cokoviçlə Nadal son sözü deməlidi”.

İvanişeviç Cokoviçin “Australian Open”də zədənin öhdəsindən necə gəlməsindən də danışıb:

“İcazənizlə bu sözləri deyim. 100 faiz deməzdim, ancaq tennisçilərin 97 faizi maqnit-rezonans tomoqrafiyasının belə nəticəsindən sonra dərhal hakimlər otağına yollanır və mübarizədən çəkilir. Ancaq Novak yox – o, başqa planetdəndi. Onun beyni fərqli işləyir. Dörd ildi onunla birgə çalışıram, hələ də məni təəccübləndirməkdədi. Hər şeyini mübarizəyə verdi. Gündə 77 prosedur. Gündən-günə durumu yaxşılaşdı, hərçənd mən bunu gözləmirdim. Düzünü desəm, şokdaydım. Yaxşı, ilk iki mərhələ bir yana, ancaq Dimitrovla oyunda çox qorxurdum. Ancaq bunu araxada qoydu və turniri qazandı”.
Xatırladaq ki, “Böyük dəbilqə”ni 22-ci dəfə qazanan Cokoviç bu göstəricidə Nadala çatıb. “Rolan Qarros” isə mayın 28-i – iyunun 11-i aralığında keçiriləcək.