Kolumbiya yığmasının sabiq oyunçusu Freddi Rinkon aprelin 13-də dünyasını dəyişib.

O, qəza nəticəsində aldığı xəsarətlərdən 55 yaşında vəfat edib. Aprelin 11-də Rinkonun idarə etdiyi avtomobil Kolumbiyanın Kali şəhərində avtobusla toqquşub. Şahidlərin dediyinə görə, futbol veteranı qırmızı işığa məhəl qoymayıb və onun maşını avtobusa çırpılıb. Freddi ağır vəziyyətdə xəstəxanaya çatdırılıb, ancaq həkimlərin iki gün ərzindəki səylərinə baxmayaraq, onun həyatını xilas etmək mümkün olmayıb.

Rinkon peşəkar karyerasını “Santa Fe” (1986-89), “Amerika de Kali” (1990-93), “Parma” (1993-94), “Napoli” (1994-95), “Real” (1995-96), “Palmeyras” (1996-97), “Korintians” (1997-2000, 2004), “Santos” (2000) və “Kruzeyro”da (2001) keçirib. Keçmiş yarımmüdafiəçi 1990-2001-ci illərdə Kolumbiya millisində 84 oyuna 17 qol vurub. 2005-10-cu illərdə bir sıra klublarda məşqçi kimi çalışan Rinkon son vaxtlar yerli telekanallarda şərhçilik edirdi.