Şənbə günü Türkiyə futbolundan növbəti maraqlı xəbər gəldi. Belə ki, Türkiyə Futbol Federasiyasının (TFF) nəzdində fəaliyyət göstərən Hakimlər Komitəsi (HK) prezident Səbri Çəlik başda olmaqla tam tərkibdə istefa verdi.

Xatırladaq ki, bu, 63 yaşlı Çəlikin HK-da 3-cü dönəmi idi. O, daha öncə 2004-05-ci illərdə, eləcə də 2019-da təxminən 5 ay bu vəzifəni icra etmişdi. Çəliyin 3-cü dönəmi ötən ilin martında başlamışdı. Əslində bu mövsümdən etibarən Türkiyə futbolunda hakimlik baxımından bəzi yeniliklər tətbiq edilmişdi. Məsələn, hakim təyinatları kompüter vasitəsilə həyata keçirilirdi. Amma bu istənilən effekti vermədi. Mövsümün əvvəlindən etibarən klublar yenə hakimlikdən şikayətlənməyə başladılar. Bir müddət öncə hətta Türkiyədə bir ilk yaşandı və iki oyunda hakimlə VAR arasındakı dialoqlar ictimaiyyətə açıqlandı. Yanvarın 9-da “İstanbul BŞ”yə 1:3 hesablı məğlubiyyətdən sonra “Adana Dəmirspor”un qalmaqalçı prezidenti Murat Sancak hakimliyi yıxıb-sürüdü və birmənalı şəkildə Səbri Çəliyin istefasını istədi. Türkiyə mətbuatının yazdığına inansaq, federasiya prezidenti Mehmet Büyükekşi etirazların artdığını görərək Çəlikdən istefa verməyi tələb etdi. Sonuncu da onun tələbini yerinə yetirərək istefa məktubunu federasiyaya təqdim etdi. Göründüyü kimi, HK-da prezident dəyişiklikləri ildırım sürəti ilə yaşanmaqda davam edir. Bu üzdən də qardaş ölkədə hakimlik “bir addım irəli, iki addım geri” prinsipi ilə hərəkət edir. Maraq üçün bildirək ki, bu, son 10 ildə HK-da yaşanan 10-cu prezident istefasıdı! Bu müddətdə 6 fərqli isim – Yusuf Namoğlu (2014, 2016), Kuddusi Müftüoğlu (2015), Səbri Çəlik (2019, 2023), Zəkəriyyə Alp (2019), Sərdar Tatlı (2020) və Fərhat Gündoğdu (2021) bu vəzifəni icra edib.

Dünən isə HK-nın yeni sədrinin adı federasiya tərəfindən rəsmən açıqlandı. Əslində namizədlər elə də çox deyildi. Əvvəlcə Kuddusi Müftüoğlunun adı hallansa da, federasiya ona etibar etmədi. Karyerasını yeni başa vuran Cüneyt Çakırla Fırat Aydınusun adı da ortaya atılmışdı. Bunlardan birini yeni vəzifədə görmək maraqlı olardı. Amma məhz karyeralarını yenicə – ötən yay başa vurmaları onlara mane oldu. Belə ki, TFF-nin qaydalarına görə bir hakim yalnız karyerasını bitirəndən bir il sonra HK- başına keçə bilər. Çox güman, yaxın gələcəkdə bu ikilidən birini mütləq bu vəzifədə görəcəyik. Hələlik isə TFF böyük bir sürprizə yol verərək HK-nın başına qadın gətirməyə qərar verdi! Söhbət Lalə Ortadan gedir. 62 yaşlı Lalə Orta həm Türkiyənin ilk qadın məşqçisi, həm ilk qadın hakimi, həm də ilk qadın FİFA hakimi olub. Karyerası ərzində həvəskar və peşəkar səviyyədə 1500-dən çox oyun idarə edib. Orta Türkiyə çempionatında ilk dəfə 1990-cı il mayın 20-də “Qalatasaray” – “Sarıyer” oyununa yan xətt hakimi qismində təyinat alıb. Baş hakim kimi isə onun elitadakı ilk oyunu 1999-cu il mayın 29-da keçirilən “Sakaryaspor” – “Ankaragücü” qarşılaşması olub. 2000-ci ildə doktoranturanı bitirərək ölkədə ilk qadın futbol həkimi statusunu da qazanıb. Son dönəmlərdə Lalə Orta “Bein Sports”da şərhçi kimi fəaliyyət göstərirdi və sabiq hakimlər – Dəniz Çoban, Bülənt Yıldırımla birlikdə superliqa matçlarının hakimliklə bağlı məqamlarını şərh edirdi. Beləliklə, Türkiyə futbolunda ilk dəfə HK-nı artıq qadın idarə edəcək. Komitənin yeni tərkibi də bəlli olub. Tolga Özkalfa, Ahmet İbanoğlu, Cəmaləddin Əli Kunak, Əli Kızılət, Süleyman Abay, Sadəttin Gülər, Aynur Aysun Akar və Həmzə Mısır bundan sonra HK-da çalışacaq.

Dünən Lalə Orta ilə bağlı diqqətçəkən bir olay yaşandı. Adəti üzrə Türkiyə futbolunda yeni sima peyda olanda futbolsevərlər onun keçmişini, sosial şəbəkələrdəki paylaşımlarını araşdırmağa başlayır. Lalə Orta da istisna təşkil etmədi. “Qalatasaray”lılar onun “Fənərbaxça”lı olduğunu iddia edərək ilk gündən istefasını (!) tələb etdilər. Səbəb isə odu ki, Lalə Orta illər öncə Əli Koçun olduğu bir tədbirdə iştirak edibmiş və bunu sosial şəbəkədə paylaşıbmış. “Fənər”in prezidenti həmin vaxt hələ Okan Universitetində təhsil alırmış. Bir andaca gündəm olan Lalə Orta çarəni “tvitter” səhifəsini bağlamaqda gördü.