Türkiyə Futbol Federasiyasında prezident seçkisi hələ iyunun 16-da keçirilsə də, qurumun nəzdində fəaliyyət göstərən Hakimlər Komitəsinin (HK) yeni tərkibi bəlli deyildi.

Football-plus.az xəbər verir ki, qurumun yeni sədri və tərkibi dünən bəlli oldu. Federasiyanın yeni başqanı Mehmet Büyükekşi verdiyi son müsahibədə bu vəzifə üçün Səbri Çəliklə danışıqlar aparıldığını demişdi. Beləliklə, qarşıdakı bir ildə qardaş ölkədə hakimlərə Səbri Çəlik başçılıq edəcək! 63 yaşlı futbol adamının əsas peşəsi müəllimlikdi. Amma o, uzun illərdi hakimlik sahəsində çalışır. Çəlik 1986-97-ci illərdə Türkiyə çempionatında ümumilikdə 147 oyun idarə edib və avrokubok matçlarına da təyinat alıb. Bundan başqa, daha öncə 2004-ün iyulundan 2005-in mayına qədər, eləcə də 2019-da fevraldan iyula qədər HK-nın sədri olub. Elə ən son bu ilin aprelində qalmaqallı qərarlarından sonra istefaya göndərilən HK sədri Fərhat Gündoğdunu məhz Çəlik əvəzləyərək ötən mövsümün son ayında bu vəzifəni icra etmişdi. Yəni Çəlik faktiki qaldığı yerdən davam edəcək.

Komitənin yeni heyətinə gəlincə, ora Səbri Çəlikdən başqa bu isimlər daxildi: Murat İlqaz, Aynur Aysun Akar, Baki Tuncay Akkın, Ahmet İbanoğlu, Aytəkin Durmaz, Rəcəp Sürhat Müniroğlu, İsmayıl Kösə, Bülənt Gökçü. Bu isimlərdən xüsusilə Aynur Aysun Akar diqqəti çəkir. Mehmet Büyükekşi yeni komitəyə bir xanım götürəcəklərini etiraf etmişdi və sözünün üstündə durdu. Aynur Aysun Akar HK tarixinə Lalə Ortadan sonra ikinci xanım kimi düşdü. Əslən Qaziantepdən olan 41 yaşlı Akar Qaziantep Universitetinin Bədən Tərbiyəsi və İdman fakültəsinin məzunudu. FİFA hakimi olan Akar indiyə qədər aşağı liqalarda, eləcə də həvəskarlar liqasında bir çox oyun idarə edib. Superliqada isə xanım hakimlərin 2023-cü ildən etibarən oyunlara təyinat alacaqları gözlənilir.