Yanvarın 25-də Millətlər Liqasında 2022/23 mövsümünün final mərhələsinin püşkatma mərasimi keçirilib.

Football-plus.az xəbər verir ki, “Dördlər finalı”nda iki cütü müəyyənləşdirən tədbir İsveçrənin Nyon şəhərində baş tutub.

Xatırladaq ki, 2022-ci ildə keçirilən seçmə mərhələnin nəticələrinə görə A liqasının 4 qrupunda birinci yeri tutan Xorvatiya, İspaniya, İtaliya və Niderland yığmaları kubok uğrunda mübarizəni davam etdirmək hüququ qazanmışdı.

Həlledici oyunların Niderlandın Rotterdam və Ensxede şəhərlərində təşkil olunacağı məlum idi. Püşkün nəticələrinə görə, iyunun 14-də Rotterdamdakı ilk yarımfinal oyununda Niderland və Xorvatiya, ertəsi gün isə Ensxededə İspaniya ilə İtaliya qarşılaşacaq. Bu mərhələnin məğlubları iyunun 18-də Ensxededə 3-cü yer uğrunda matçda, qalibləri isə həmin gün Rotterdamda keçiriləcək finalda oynayacaqlar.