Skibbe yaponları İstanbulla tanış etdi
Almaniyanın tanınmış mütəxəssislərindən olan və bir ara yolu Türkiyədən də keçən Mihael Skibbe türkiyəli həmkarlarımıza açıqlamalar verib.
Football-plus.az xəbər verir ki, 57 yaşlı mütəxəssis noyabrın sonlarından bəri başında olduğu Yaponiya təmsilçisi “Sanfreççe Hiroşima” ilə toplanış keçmək üçün Türkiyəyə gəlib.
Antalyada toplanış keçdikdən sonra o, futbolçularına İstanbulun gözəlliyini göstərmək qərarına gəlib. Skibbe 2008/09-da “Qalatasaray”ı çalışdırıb. Həmin mövsümün əvvəlində superkuboku qazanmasına baxmayaraq, uğursuz nəticələr üzündən ikinci dövrənin gedişində istefaya göndərilmişdi.
“Cim-Bom”dan başqa qardaş ölkədə “Karabükspor”u (2012) və iki fərqli dönəmdə “Əskişəhərspor”u (2011, 2015) çalışdıran Skibbe bunları deyib: “Antalyadakı gözəl şərait bizim üçün sürpriz olmadı. Daha öncə çalışdığım klublarda dəfələrlə Belekdə toplanış keçmişdim. Yüksək səviyyədə xidmət göstərən gözəl oteldə qaldıq və əla meydançalarda məşq etdik. İndi də komanda ilə birlikdə İstanbulu gəzmək üçün burdayıq. İstanbulun necə möhtəşəm şəhər olduğunu oyunçularıma göstərmək istədim. Türkiyə futbolunu, təbii ki, həmişə yaxından izləyirəm. “Qalatasaray”ın lider olması məni sevindirir. Bu klubun hər zaman qəlbimdə xüsusi yeri var. Amma son illərdə fərqli klubların çempion olduğunu görmək xoşdu. 2019/20-də “İstanbul BŞ”, ötən mövsüm “Trabzonspor” çempion oldu. Bu da onu gösətrir ki, çempionat 1-2 komandanın əlində deyil. Bu, həm turnirin səviyyəsini artırır, həm də superliqaya rəngarənglik qatır. Ümid edirəm ki, sonrakı illərdə də fərqli çempionlar görəcəyik. Türkiyə mənim üçün önəmli ölkədi və bura ilə bağlı gözəl xatirələrim var. Bir gün Avropaya qayıtsam, Türkiyə həmişə mənim üçün birinci variant olacaq. Tək “Qalatasaray” yox, “”Karabükspor” və “Əskişəhərspor” ilə bağlı da gözəl xatirələrim var. “Qalatasaray” mənim dönəmimdə ev oyunlarını “Əli Sami Yen”də keçirirdi. Orda inanılmaz atmosfer olurdu. Televizordan izlədiklərimə əsasən deyə bilərəm ki, indiki yeni stadionda da əla ab-hava olur. “Qalatasaray”ı liderlik münasibətilə təbrik edirəm. Səmimi qəlbdən onların çempion olmasını istəyirəm”.
Digər xəbərlər
