“Bu mənim təşəbbüsümdü. “Qarabağ”da işlədiyim vaxtlardan görürdüm ki, buna tələbat var. Şəxsi “feysbuk” hesabımda da bununla bağlı post paylaşmışam. Orda da zərurətin olduğuna eyham vurmuşam. Dünyada belə təcrübələr var. Bilmirəm, bizdə olub, ya yox. Düzdü, insanlar Avropaya gedərək oyunları izləyiblər. Lakin çoxu Şengen vizasına görə problem yaşayıb. Biz də qərara aldıq ki, vizadəstəkli iş görək. Ehtiyac olarsa, bu məsələni də həll edirik. Bundan başqa, otel bronu, oyun biletini də təşkil edirik. Yəni insanların Avropaya getməsinin səbəblərini səfirliyə göstərə bilirik. Bu da qarşılaşmanı izləmək üçün Belçikaya getmək istəyənlərə viza alınmasında üstünlük təşkil edəcək. Mən bu təklifi edəndə “Qarabağ” rəhbərliyi bəyəndi. Hətta Gənclər və İdman Nazirliyi də təşəbbüsə dəstək verdi, sosial şəbəkə hesablarında kampaniyanı paylaşdı. Bilirsiz ki, nazirlikdə dəyişikliklər olandan sonra belə məsələlərə xüsusi önəm verirlər. Həm “Qarabağ”ın, həm də nazirliyin şirkətimizə dəstək olması məni olduqca sevindirdi. Layihəyə hədsiz dərəcədə maraq var. Bəlkə də 500-ə yaxın müraciət daxil olub. Nə qədər adamın gedəcəyini deyə bilmərəm. Amma 500 nəfərin müraciət etməsi yaxşı haldı. Bəli, qiymət 1700 manatdan başlayır. Bura gediş-gəliş xərcləri, 20 kq baqaj daxildi. Artıq futbolu turizm kimi də görmək lazımdı. İnsanlar səfərə təkcə futbola baxmağa yox, həm də istirahət etməyə, əylənməyə gedirlər. Bu müddət ərzində ölkəni, şəhəri, mədəniyyəti kəşf edirlər. Bir nüansı diqqətinizə çatdırım ki, seçdiyimiz otellər həm şəhər mərkəzinə, həm də stadiona yaxındı. Bundan başqa, dediyim kimi, xidmətə 2 günlük otel qiyməti, səhər yeməyi, stadiona gediş-gəliş, aviabilet və oyun bileti daxildi. Çox cüzi xidmət haqqı qoymuşuq. Qalan xərclərin hamısı yuxarıda sadaladıqlarımıza sərf olunacaq. Bunu da edirik ki, insanlar belə şeylərə alışsınlar. Həm də bundan böyük pullar qazanmaq nəzəri cəhətdən mümkün deyil. Ola bilər ki, kimsə xanımı və ya dostu ilə getmək istəyir. Yəni onlar bir otaqda qalmaq istəsələr, onda qiymət dəyişir. İki nəfər üçün 3 min manat tələb edirik. Haqlısız ki, qiymət dəyişə bilər. Biz də ona görə standart məbləğ tərtib etmişik. Bu həm də “Qarabağ”a dəstək olmaq üçün nəzərdə tutulub. Bu kampaniya Avropadakı azərbaycanlıların da marağına səbəb oldu. Onlar da həmin gün qarşılaşmanı burdan gedənlərlə izləmək istəyirlər. Bir növ bu kampaniya Avropadakı azərbaycanlılara təşviq oldu. Onlar bizdən başqa ölkələrdə oyuna necə gələ biləcəyimizi soruşurlar. Bu yöndə onları məlumatlandırırıq. Xoşbəxtəm ki, bizim kampaniya “Qarabağ”a bu yöndə də dəstək oldu”.

“Bu gün “Neftçi”nin Media, Marketinq və İctimaiyyətlə Əlaqələr Departamentinin rəhbəri Rüstəm Allahverdiyevlə danışdıq. Bildirdi ki, əla təşəbbüsdü. Hətta zarafatla dedi ki, bu işi “Qarabağ”la təcrübədən keçir. Növbəti dəfə “Neftçi”nin avrokubok matçında bu layihəni təmtəraqlı şəkildə həyata keçirərsən. Burdan da belə başa düşmək olar ki, şirkətimizin təşkil etdiyi kampaniya ölkə daxilində yaxşı mənada əks-səda doğurub”.