“Qarabağ”ın yox, jurnalistlərin Fransaya səfərini təşkil etmişəm. Təşəbbüs Altay Əliyevdən gəldi. Onun layihəsi çərçivəsində 8 media mənsubunun səfəri zamanı logistika, qidalanma və məskunlaşma xidmətini öz üzərimizə götürmüşdük. Ümid edirik ki, bu işin öhdəsindən layiqincə gəldik. Fürsətdən istifadə edib Altay Əliyevə xüsusi təşəkkürümüzü bildirirəm. O, məhkəmə prosesi zamanı da mənə dəstək oldu. Bu işi bizə tapşırması da sevincimizə səbəb oldu. Bu səfəri təşkil etməklə göstərdik ki, təkcə idmançılara xidmət etmirik, həm də jurnalistlərə kömək edirik. Hədəflərimiz böyükdü. Artıq klublarla danışıqlar aparırıq. “Neftçi”nin prezidenti Kamran Quliyevlə görüşmüşəm. İdman direktoru Zaur Əzizovla danışığımız oldu. “Qəbələ”nin prezidenti Fariz Nəcəfovla da görüşümüz olub. Onlardan dəstək aldım. Mümkün olan bütün məsələlərlə bağlı əməkdaşlıq edə biləcəklərini söylədilər. Klublarla danışıqlarda əsas məqsəd 15 illik “Qarabağ” karyeramda əldə etdiyim təcrübəni spesifik sahədə xərcləməkdi. Bu sahə üzrə Azərbaycanda boşluq var idi. İndi təcrübəmizi bu istiqamətə yönləndirmək istəyirik. Nə qədər bacaracağımızı zaman göstərəcək. Düşünürəm ki, işlərimiz artdıqca, təcrübəmiz sayəsində hamısının öhdəsindən layiqincə gələ biləcəyik”.