Ukraynada baş verən hadisələr üzündən Rusiya futbolu çətin günlər keçirməkdə davam edir.

Football-plus.az xəbər verir ki, məsələ hətta o yerə çatıb ki, hazırlıq dönəmində də Avropanın bir sıra klubları Rusiya təmsilçiləri ilə qarşılaşmaqdan imtina edir!

Bu il hazırlıq dönəmində Rusiya klublarının xarici klublara qarşı keçirməyi planlaşdırdığı oyunların sayı əhəmiyyətli dərəcədə azalıb. Ruslarla oynamağa razılıq verənlərin əksəriyyəti isə Avropadan deyil. İmtina məsələsinin əsası ötən il yığmalar səviyyəsində qoyuldu.

Bilindiyi kimi, noyabrda Rusiya Bosniya və Hersoqovina ilə qarşılaşmalıydı. Amma bosniyalılar ictimai qınağı nəzərə alaraq bu oyundan boyun qaçırdılar. Nəticədə şimal qonşularımız Özbəkistanla oynamalı oldular. Bu məqamı nəzərə alanda Moskva “Dinamo”sunun yanvarın 29-da Bosniya təmsilçisi “Borats”a qarşı keçirməli olduğu hazırlıq matçı sual altındadı. Klub futbolunda isə imtina baxımından ən çox fəallıq göstərən Bolqarıstan təmsilçiləridi. Məsələn, “Levski”nin yanvarın 17-də “Krasnodar”, 22-də “Spartak”, 31-də isə “Ural” ilə oyunu nəzərdə tutulmuşdu. “Krasnodar”la qarşılaşma səssiz-sədasız və səbəbsiz şəkildə oynanılmadı. “Spartak”la matçdan öncə isə çılğın “Levski” fanatları etiraz aksiyası keçirdilər. Rəhbərlik müxtəlif variantlarla vəziyyətdən çıxmağa çalışırdı. Komandanın meydana Ukrayna bayraqları ilə çıxması və oyununun canlı yayınlanmaması variantı təklif olundu. Amma gözüdönmüş fanatları bu da sakitləşdirmədi. Bu üzdən “Levski” rəsmi açıqlama verərək və səbəb kimi “ümumi təzyiqi” göstərərək “Spartak”la “Ural”a qarşı oynamaqdan imtina etdi. “Levski”nin ardından Bolqarıstanın digər təmsilçisi “Beroe” ilə Macarıstan təmsilçisi “Tisakeçke” “Nijni Novqorod”a qarşı oyundan boyun qaçırdı. Çox keçmədən Danimarka təmsilçisi “Vayle”də ÇSKA ilə oyunun baş tutmayacağını açıqladı. Ruslarla oynamaqda bir problem görməyən klublardan biri “Sumqayıt” oldu. Təmsilçimiz yanvarın 17-də “Krılya Sovetov”a minimal hesabla boyun əydi. Rusiyanın digər klublarından fərqli “Spartak” bu məsələni elə-belə qoymayaraq “Levski”dən kompensasiya tələb etmək fikrinə düşdü və qarşı tərəfə rəsmi məktub göndərdi. Yanvarın 22-də “Levski” əvəzinə Özbəkistan təmsilçisi AGMK ilə qarşılaşan moskvalılar istəklərinə çatdılar. Nəticədə “Levski” “Spartak” və “Ural”ın hərəsinə 20 min bolqar levi (təxminən 10,2 min avro) kompensasiya ödəməyə razılıq verdi. Özü də baş məşqçi Stonimir Stoylovla icraçı direktor İvaylo İvkov bu pulu öz cibindən ödəyəcək! Maraqlıdı ki, “Spartak”ın yanvarın 27-də Bolqarıstanın digər klubu “Beroe” ilə oyunu nəzərdə tutulub. Hələ ki bu oyun qüvvədədi.

Yeri gəlmişkən, yanvarın 24-də Rusiya Futbol İttifaqının nümayəndələri UEFA rəsmiləri ilə görüş keçirdilər. Görüşdə Rusiya yığmasının və klublarının beynəlxalq oyunlara buraxılması məsələsi müzakirə olundu. Gözlənildiyi kimi, ciddi bir yenilik olmadı. Rusiya yığmasının və klublarının beynəlxalq oyunlardan qeyri-müəyyən müddətə kənarlaşdırılması ilə bağlı ötən il fevralın 28-də qəbul edilən qərar qüvvədə saxlanıldı. Rusiyanın Ukraynaya hərbi təcavüzünün davam etdiyi müddətdə bu qadağanın ləğv olunmasını gözləmək gülməli olardı. UEFA məsələ ilə bağlı yeni qərar üçün ən azı mövsümün sonuna qədər gözləyəcək. Yeni avrokubok mövsümünün püşkatmasına qədər Rusiya caynaqlarını Ukraynadan çəksə, onda qadağanın götürülməsi ehtimalı var. Amma yığmanın aqibətinin necə olacağı bilinmir. Çünki AÇ-2024-ün seçmə mərhələsi artıq martda start götürəcək.

Bu arada daha bir önəmli qərar odu ki, Kazan böyük ehtimalla Avropa Superkubokuna evsahibliyi etmək hüququndan məhrum olunacaq! Bilindiyi kimi, UEFA hələ 2020-nin martında açıqlamışdı ki, 2023-də ÇL-in və AL-in qaliblərinin üz-üzə gəldiyi Superkubok qarşılaşması Kazanda keçiriləcək. İtaliya mətbuatının iddiasına görə, UEFA artıq bu matçın keçirilməsi üçün yeni məkanın axtarışlarına start verib! Rəsmi açıqlamanın ən qısa müddətdə veriləcəyi gözlənilir.