Makqreqor bu il oktaqona çıxacaq
Yüngül və yarımyüngül çəkidə sabiq UFC çempionu Konor Makqreqorun baş məşqçisi Con Kavana əmindi ki, irlandiyalı 2023-də oktaqona qayıdacaq:
“Evimi qumara qoymağa hazıram ki, Konor bu il oktaqona qayıdacaq. Onunla bugünlərdə danışmışam. Hazırda maraqlı danışıqlar gedir. Bundan artığını deyə bilmərəm, ancaq əminəm ki, Konor məhz bu il dönəcək. Görüşəcəyik, o bir neçə ad çəkəcək və onda mən biləcəyəm ki, hansı ad Konoru atəşləndirir. Mənim üçün rəqibin Konorda emosiya doğurması vacibdi, o, döyüşə hazırlaşmaq üçün motivasiya tapmalıdı. Onu ipək şalvarını çıxarıb tərli idman zalına yollanmağa nə məcbur edəcək? Daha bir neçə milyon dollar? Çətin ki… O artıq ikiqat çempion olub. Rəqib, onun vərdişləri həlledici rol oynayır. Məsələn, Neyt Dias. Castin Qetji də maraqlı variant ola bilər. Maykl Çendler əla atletdi. Bütün bu variantlar gözəldi. Ancaq bir ad tapmaq lazımdı ki, Konoru yerindən qalxmağa və hərəkət etməyə məcbur etsin. Konorda döyüşə maraq görməsəm, həyəcanlanmağa başlayacam. Onda məşq düşərgəsində gərgin ab-hava olacaq. Amcaq Konor konkret rəqibə görə hazırlaşsa, motivasiya tapa bilsə, düşərgəmizdə ab-hava yaxşılaşacaq”.
Xatırladaq ki, Makqreqor 2021-ci il iyulun 10-da keçirdiyi son döyüşdə Dastin Poryeyə texniki nokautla uduzub. Bu arada UFC-nin yarımyüngül çəkidə sabiq çempionu Joze Aldo Frenki Edqarı məğlub edəndən sonra Konordan maraqlı hədiyyə almasından danışıb:
“Bu, sadəcə, kiçik zarafat idi. Las-Veqasdakı “Red Rock” otelində qalırdım. Həmin gecə Frenki Edqarı məğlub etmişdim. Konor zarafatla mənə qırmızı tuman göndərmişdi. Tumandan istifadə etmədim. Ancaq xanımımı onu geyməyə məcbur edə bilərdim”.
Braziliyalı döyüşçü həmçinin irlandiyalı ilə münasibətlərinin yaxşı olduğunu, sosial şəbəkədə müntəzəm yazışdıqlarını bildirib: “Ona hörmətim böyükdü, biz dostuq. Bir-birimizə abunəyik və hətta sosial şəbəkələrdə əlaqə saxlayırıq. Fanatlar mənə yaxınlaşaraq soruşurlar: “Makqreqoru döymək istəyirsən?” Cavab verirəm ki, “necə belə edə bilərəm, bu oğlan mənə hamıdan çox pul qazandırıb”. İndi ona hörmətdən başqa heç bir hiss bəsləmirəm. Əvəzçıxma döyüşü haqda düşünmürəm”.
Aldo 2015-ci il dekabrın 12-də UFC 194 turniri çərçivəsində keçirilən döyüşdə Makqreqora uduzub. Artıq 13-cü saniyədə nokauta düşən braziliyalı yarımyüngül çəkidə titulu əldən verib.
