MMA döyüşçüsü Rafael Fiziyev növbəti dəfə ABŞ təmsilçisi Castin Geycini duelə çağırıb. 29 yaşlı idmançı "MMA Fighting"ə açıqlamasında onunla döyüşmək istədiyini söyləyib. Fiziyev Mütləq Döyüş Çempionatının (UFC) 2 çəki üzrə sabiq çempionu Konor Makqreqorla isə qarşılaşmaq istəmir: "Hər kəs Makqreqora zəng edir və onunla dava etmək istəyir. Mən bunu başa düşmürəm, etmək istəmirəm. Yaxşı, get və bu şəxslə döyüş. Mən Geyci ilə üz-üzə gəlmək istəyirəm. Geyci hardadı? Niyə indiyədək mənə cavab vermədiyini başa düşmürəm. Maraqlıdı, niyə zəngimə cavab vermir? Onun da mənim kimi zədəsi var. Bundan sonra nə edəcəyimizi bilməli və hansımızın daha yaxşı olduğunu müəyyən etməliyik. Amma o, hələ də heç nə demir".
Fiziyev iyulun 9-da Las Veqasda yüngül çəkidə sabiq çempion Rafael dos Anyosu məğlub edib. Bu uğur ona UFC reytinqində top-5-ə yüksəlməkdə yardımçı olub. İdmançı zədəsini tam sağaldaraq, ilin sonunadək yeni döyüş keçirəcəyinə ümid etdiyini bildirib: "Görək burnum necə olacaq. Ötən dəfə dizimdən əməliyyat olunandan 7 ay sonra döyüşə hazır idim. Tezliklə sağalacam. Bilirsiz, mən küçə iti kimiyəm, hansısa zədəm olanda tez sağalıram. Bu dəfə də elə olacağına ümidvaram".