Atif Rüstəmov Şahin Diniyevin komandanı böhrandan çıxaracağına inanır
Antalyada təlim-məşq toplanışı keçən “Səbail”in ilk iki yoldaşlıq oyununu canlı izləyənlər arasında klubun azarkeşlərini də görmək mümkün idi.
Football-plus.az xəbər verir ki, söhbət “Dənizçilər” fanklubunun üzvlərindən gedir. Etiraf edək ki, belə halla, demək olar ki, rastlaşmamışıq. Maraqlıdı, Antalyaya neçə nəfər yollanıb? Onlar komanda ilə son günədək orda qalacaq? Ümumiyyətlə, azarkeşlərin qonşu ölkəyə səfərinin, orda qalmasının xərcləri klub tərəfindən qarşılanıb?
Bu suallar ətrafında “Dənizçilər”in rəhbəri Atif Rüstəmovla danışdıq:
“Öncə "Dənizçilər” fanklubunun rəhbəri olaraq diqqətiniz üçün təşəkkürümü bildirirəm. Antalyadakı təlim-məşq toplanışına fanklub şəklində qatılmağımız kllub rəhbərliyinin təşəbbüsü ilə baş tutdu. Qonşu ölkəyə mən və qrupun digər iki seçilmiş, köhnə azarkeşi yollanmışdı. Türkiyəyə məhz komandamızın yoldaşlıq oyunlarını izləmək üçün dəvət olunduq. Üçgünlük səfər çərçivəsində hər şey möhtəşəm oldu. Yanvarın 10-da vətənə qayıtdıq. Uşaqların işlə bağlı icazə problemləri olduğu üçün çox qala bilmədik”.
Fanklub rəhbəri yoxlama oyunlarına və Şahin Diniyevin təyinatına da toxundu:
“Bizim üçün “Legiya” ilə oyun başqalarından daha maraqlı idi. Maraqlı, əyləncəli məşqlər keçdi, bizim üçün də bir yenilik oldu. Bu addıma görə fanklub rəhbəri olaraq, kulubumuzun rəhbərliyinə dərin təşəkkürümü bildirirəm. Şahin müəllimin gəlişiylə bağlı fikrimiz yaxşıdı. Əzmkar məşqçidi, ümid edirik ki, komandamızı kubokun finalına yüksəldə bilər, çempionatda isə üst sıralarda yer alarıq. Hələ sona çox var, biz də bu yolda "Dənizçilər” olaraq kulubumuzun yanındayıq. Dəstəyimizlə əlimizdən gələni artıqlamasıyla edəcəyik”.
ŞAİR ABDULLA
Digər xəbərlər
