“Bacardığımız qədər klublarımızın yoxlama oyunlarını canlı yayınlamağa çalışırıq. Yayınladığımız ilk görüş - “Turan Tovuz” – “Petrolul” qarşılaşması zamanı hava soyuq olsa da, günəş çıxmışdı, futbol üçün əla imkan var idi. Kiçik imkanlarla televiziya tərzində bəzi işlər gördük. Oyundan öncə “Turan Tovuz”un yeni transferi Denis Marandiçin meneceri Erkin İbrahimovdan müsahibə götürdük. Şərhə klubun icraçı direktoru Nadir Nəbiyevi dəvət etdik. Oyun bitən kimi isə baş məşqçi Ayxan Abbasovun fikirlərini tamaşaçılara çatdırdıq. Yanvarın 10-dan hava tam dəyişdi. Yağış, külək ara vermədi. Bu səbəbdən “Zirə” – “Kindia” oyununun ikinci hissəsində yayını dayandırmalı olduq. Bir gün sonra isə “Şamaxı”nın həm “Kaysar”, həm də “Botoşani” ilə görüşünü yayınladıq. İkinci matçdan öncə klubun İdarə Heyətinin sədri Elçin Usubla müsahibə təqdim etdik. Fasilədə oyunu izləməyə gələn millimizin baş məşqçisi Canni de Byazidən açıqlamalar aldıq. Şərhdə isə kapitan Elvin Məmmədov yardımçı oldu. Amma bu qarşılaşmanı da, məlum olduğu kimi, sona çatdırmaq mümkün olmadı. Səhv etmirəmsə, 67-ci dəqiqədə baş hakim çarəsiz qalıb matçı saxladı. Dünən “Sabah”ın oyununda yağış sürətini azaltsa da, dayanmadı. Bu matçda isə klubun mətbuat katibi Elnur Həmidov kömək etdi. Oyundan sonra baş məşqçi Murad Musayevin fikirlərini izləyicilərə təqdim etdik”.

“Bura 3 operator, 1 canlı yayın mütəxəssisi, baş rejissor, vitse-prezident Aslan Şahgəldiyev, texniki idman direktoru Elgiz Abbasov və mən gəlmişik. Komanda şəklində çalışırıq və hər kəsin öz funksiyasına uyğun zəncirvari işi var. Təəssüf ki, nə qədər çalışsaq da, kameraları yağışdan qorumaq olmur. “Şamaxı”nın oyunundan sonra “Botoşani”nin heyəti də komandamızın əzmkarlığına biganə qala bilmədi. Çünki onların çəkiliş qrupu özləri islandıqlarına görə xeyli əvvəldən işi dayandırmışdı. “Sabah” – “Varta” oyununda da yağış dayanmadı. Qarşılaşmanın sonlarına yaxın kameralarımızdan birinin monitoru sıradan çıxdı. Amma texniki heyətimizin peşəkarlığı sayəsində matçı sonadək 3 kamera ilə yayınladıq. Oyunsonrası açıqlamadan sonra isə həmin kamera, ümumiyyətlə, sıradan çıxdı. Xoşbəxtlikdən artıq bərpa edə bilmişik və “Qarabağ”ın oyununda ondan da istifadə edə biləcəyik”.

“Səhv etmirəmsə, sonuncu dəfə 2010-cu ildə “Xəzər TV”də canlı oyun şərh etmişdim. Uzun fasilədən sonra, “yutub” yayını olsa belə, həyəcanlanmadığımı desəm, yalan danışmış olaram. İdeal şərh etməyim dəqiq olmasa da, əlimdən gələni etdiyim dəqiqdi. Yanvarın 19-dək burdayıq. Çalışacağıq ki, komandaların heç olmasa, bir oyununu canlı yayınlayaq”.