Məlum olduğu kimi, artıq bütün premyer-liqa klubları qış təlim-məşq toplanışındadı.

Komandalar Türkiyədə hazırlıq keçir. Yanvarın sonuna kimi fərqli ölkələrin klubları ilə yoxlama oyunları baş tutacaq. Bunu nəzərə alaraq qısa bir araşdırma etdik. Maraqlıdı, komandalarımız daha çox hansı ölkələrin təmsilçiləri ilə qarşılaşacaq? Ən güclü rəqiblər hansı ölkələrin təmsilçiləridi?

İlk olaraq onu bildirək ki, təlim-məşq toplanışı çərçivəsində ümumilikdə 29 yoxlama matçının keçirilməsi planşaldırılıb. Və artıq bunlardan bir neçəsi baş tutub. Təmsilçilərimiz ümumilikdə 4 dəfə Polşa klubları ilə qarşılaşacaq. “Qarabağ” adı çəkilən ölkənin “Rakuv” və “Poqon”, “Sabah” “Varta”, “Turan Tovuz” isə “Qurnik” komandası ilə münasibətləri aydınlaşdıracaq. 8 dəfə Serbiya komandaları rəqib olacaq. “Qarabağ” “Çukariçki”, “Sabah” Voyvodina”, “Zirə” “Radniçki”, “Şamaxı” “Napredak”, “Kəpəz” “Novi Pazar”, “Səbail” “Spartak”, “Sumqayıt” “Radnik”i sınağa çəkəcək. “Neftçi” isə bu ölkənin iki - “Baçka Topola” və “Srvena Zvezda” klubları ilə üz-üzə gələcək. Macarıstan komandaları da klublarımızın qüvvəsini sınayacağı rəqiblər arasındadı. “Vaşaş” artıq “Neftçi”ylə münasibətləri aydınlaşdırıb. “Seqed” isə “Zirə” ilə qarşılaşacaq. Həmçinin “Kəpəz” “MTK Budapeşt”i sınağa çəkəcək. “Zirə”nin Rumıniya “Kindia”sına qarşı görüşü artıq reallaşıb. “Qəbələ” bu ölknin “Sepsi”, “Turan Tovuz” “Petrolul”, “Şamaxı” isə “Botaşani” komandaları ilə gücünü sınayacaq. “Kəpəz” “Şamaxı”nın dünən üzləşdiyi Qazaxıstan “Kaysar”ını sınağa çəkəcək. Bundan əlavə, Çexiyanın iki klubu da rəqibimiz olacaq. “Qəbələ” “Teplitse”, “Səbail” isə “Bohemians”la oynayacaq. “Qəbələ” digər matçda Almaniya “Lukenvald”ı, “Turan Tovuz” İsveçrə “Aarau”su, “Sumqayıt” isə Rusiya “Krilya Sovetov”u ilə qarşılaşacaq.

İlk baxışdan göründüyü kimi, komandalarımız ən çox Serbiya təmsilçiləri ilə üz-üzə gələcək. Əlbəttə, həm səviyyə, həm də say baxımından Serbiya klubları başqalarından seçilir. Həmçinin komandalarımız Polşa, Macarıstan və Rumıniyanın 4 təmsilçisi ilə üz-üzə gələcək. Bu ölkələrdən səviyyə baxımından, heç şübhəsiz, Polşanı üstün saymaq olar. Ümumilikdə belə bir nəticə çıxarmaq olar ki, premyer-liqa klublarının sınaqçı-rəqibləri heç də zəif deyil. Əlbəttə, səviyyəli komandalarla görüşlərdə güclü və zəif nöqtələri üzə çıxarmaq daha asandı. Amma necə deyərlər, buna da şükür!
ŞAİR ABDULLA