"2-ci, 3-cü, 4-cü yerlər üçün yox, çempionluq uğrunda mübarizə aparmalıyıq" - Höccət Haqverdi
"Əla hisslər keçirirəm. Əvvəllər Azərbaycanda oynamışam. "Neftçi"ni tanıyıram. Əla klubdu".
Football-plus.az xəbər verir ki, bu sözləri "Neftçi TV"yə açıqlamasında Höccət Haqverdi deyib.
Flaqmanın yeni transferi klubun böyük tarixə malik olduğunu dilə gətirib:
"Hər bir futbolçu "Neftçi"də oynamaq istəyir. Çox tanınmış klubdu. Böyük tarixə malikdi. Çoxlu azarkeşləri var. Burda olduğum üçün xoşbəxtəm. Öz oyunumu burda göstərmək üçün çox istəkliyəm".
Höccət çempionatın ikinci hissəsinə 80 faiz hazır olduğunu dilə gətirib:
"İran çempionatında fasilə idi. Təbii ki, bütün liqalarda fasilə olanda futbolçular istirahət edir. Amma peşəkar oyunçu olaraq bədəninin qayğısına qalmalısan. Bir neçə gün istirahət etdikdən sonra şəxsi məşqçimlə hazırlıqlara başladım. İndiki halda özümü 80 faiz hazır hiss edirəm. Komanda ilə məşqlərə qoşulmalıyam ki, tam hazır olum".
Müdafiəçi əsas heyətdə yer almaq uğrunda rəqabət aparacağını bildirib:
"Əlbəttə, uğur qazanmaq üçün hər bir klubda futbolçular arasında rəqabət olmalıdı. Belə məqamda mübarizə daha da maraqlı olur. Hər bir futbolçu start heyətində yer almaq üçün mübarizə aparmalıdı. Bu, təkcə mənim üçün deyil, komandanın uğurları üçün faydalıdı".
Höccət baş məşqçi Laurentsiu Regekampfla söhbət etdiklərini də qeyd edib:
"Bura gələndən sonra baş məşqçi ilə aramızda danışıq olub. Hazırkı vəziyyətim, hazırlığım haqda suallar verdi. Məndən nələr istədiyini izah etdi. Hər şey aydın oldu. Mənim üçün hər şey qaydasındadı".
Müdafiəçi qış fasiləsindən sonrakı hədəfləri barədə də danışıb:
"Bayaq dediyim kimi, "Neftçi" addı. Nəinki Azərbaycanda, hətta başqa ölkələrdə də. Yəni, 2-ci, 3-cü, 4-cü yerlər üçün yox, çempionluq uğrunda mübarizə aparmalıyıq. Bu, mənim əsas məqsədimdi. Çempionatda birinci yer uğrunda mübarizə aparmalıyıq və kubokda qalib olmalıyıq. Ümid edirəm ki, bundan sonra Avropada da uğur əldə edərik".
Digər xəbərlər
