Kadi Borjes karyerasını Avropanın “Qarabağ”dan da böyük klubunda davam etdirmək, şöhrət qazanmaq yolunu yox, dünyanın gözündə nifrət obyektinə çevrilən Rusiyanı, daha dəqiqi, pulu seçdi.

“Krasnodar”a keçidin heç bir ciddi karyera əsaslandırması yoxdu. Şəxsən mən belə düşünürəm ki, bu klubun prezidenti Sergey Qalitskinin (Arutyunyanın) pulunu seçməsi braziliyalı futbolçu üçün qətiyyən yaxşı qərar deyil. Hələ o başqa məsələ ki, Krasnodar diyarında və elə bu şəhərin özündə yüzminlərlə erməni yaşayır. Həmin ermənilərin Azərbaycanın “Qarabağ”ından gələn futbolçuya isti münasibət göstərmək perspektivi də qaranlıq görünür. Kadi kökündə erməni qanı da olan prezidentin komandasında, Aram Fundukyanın kommersiya direktoru olduğu, Eduart Spertsyanın orta xəttində yer aldığı “Krasnodar”da xarüqələr yaratmağa çalışacaq. O qədər inanmasam da, təki xeyirli olsun! Nədənsə “Təhminə” filmindən məşhur monoloq yadıma düşdü: “Bilirsən Zaur, həyatdı, hər şey ola bilər. Yəqin ki haçansa rastına başqa qadınlar da çıxacaq. Mütləq çıxacaq. Amma inan mənə, Zaur, heç kəslə bu cür olmayacaq...”

ORXAN