Braziliyada Pelenin vəfatına görə 3 günlük matəm elan edilib. Müvafiq fərmanı ölkənin prezidenti Jair Bolsonaru verib.

Braziliya yeni ili matəm ab-havasında qarşılayacaq. Əfsanəvi futbolçu ilə vida mərasimi də keçiriləcək. Mərasim “Santos” klubunun stadionunda olacaq. Qeyd edək ki, dekabrın 23-dən əfsanəvi futbolçunun səhhətinin pisləşdiyi açıqlanandan sonra artıq anım mərasiminin təşkili üçün avadanlıqlar stadiona gətirilməyə başlanılmışdı. Mərasimin nə vaxt başlayacağı açıqlanmasa da, günyarım davam edəcəyi gözlənilir. Pelenin tabutu stadionun mərkəzində qoyulacaq. Mərhumla vidalaşmaq istəyənlər tabutun yanından dayanmadan keçə biləcəklər. Mərasim sona çatandan sonra tabutu aparan maşın polis kortejinin müşayiəti ilə Santosun əsas küçələrindən, həmçinin onun anasına məxsus evin qarşısından keçəcək. Braziliya yığmasının sabiq hücumçusunun “Ekumenika” nekropolunda dəfn olunması qərara alınıb.

Maraq üçün qeyd edək ki, bu məkan “Ginnesin rekordlar kitabı”na dünyada ən yüksək şaquli qəbiristanlıq kimi düşüb. Yanvarın 3-nə təyin olunan dəfn mərasiminin bir hissəsi rəsmilər və qonaqlar üçün qapalı keçəcək. “Ekumenika”da Pelenin doğmaları və dostlarının dəfn olunduğunu da bildirək.