Skaloninin aqibəti müəyyənləşdi
Lionel Skaloninin aqibəti müəyyənləşib.
Football-plus.az xəbər verir ki, Argentina Futbol Assosiasiyası (AFA) yığmanın baş məşqçisi ilə müqaviləni yeniləyəcək.
44 yaşlı mütəxəssisin AFA ilə sözləşməsinin müddəti ilin sonuna qədər nəzərdə tutulub. Futbol qurumunun prezidenti Klaudio Tapya yerli mətbuata açıqlamasında Skaloni ilə razılığa gəldiklərini bildirib:
“Skalonini yığmaya təyin etdiyimiz vaxt məni “dəli”adlandırırdılar. Tənqidçilərin 99 faizi deyirdi ki, başımız işləmir. Amma argentinalılar indi onunla fəxr edirlər. Ümid edirəm ki, Skaloni millinin baş məşqçisi kimi qalacaq. Bizim bu barədə qərarımız qətidi. Artıq onunla şifahi razılığa gəlmişik. O, övladlarından birinin pasportla bağlı problemini həll etmək üçün İspaniyaya yollanıb. Qayıdandan sonra məşqçi ilə müzakirələr aparacağıq”.
Xatırladaq ki, Skaloni milli komandaya 2018-ci ildə təyinat alıb. Argentina yığması onun rəhbərliyi altında 2021-ci ildə Amerika Kubokunun, bu il isə Finalissimanın və Qətərdə keçirilən dünya çempionatının qalibi olub.
Digər xəbərlər
