RFİ səsverməni təxirə saldı
Rusiya Futbol İttifaqı (RFİ) UEFA-nın sıralarını tərk edərək Asiya Futbol Konfederasiyasına (AFK) mümkün keçidlə bağlı səsverməni təxirə salıb.
Football-plus.az xəbər verir ki, bu prosesin ilin sonuna qədər sona çatması gözlənilir.
Bilindiyi kimi, UEFA və FİFA fevralın 28-də Rusiyanın Ukraynaya hərbi müdaxiləsinə görə şimal qonşumuzun klub və yığma komandalarını beynəlxalq yarışlardan kənarlaşdırıb. RFİ dekabrın 23-də UEFA-dan ayrılmaq və AFK-ya qoşulmaq perspektivləri ilə bağlı məsələni müzakirəyə çıxarmışdı. Futbol qurumunun prezidenti Aleksandr Dyukov bir neçə gün əvvəl İcraiyyə Komitəsinin səsverməni dekabrın 27-də keçirəcəyini bildirmişdi.
Lakin səsvermə təxirə salınıb. Bu barədə futbol qurumunun mətbuat xidməti məlumat yayıb:
“RFİ UEFA-dan ayrılmaq və AFK-ya keçmək məsələsi ilə bağlı İcraiyyə Komitəsinin səsverməsini təxirə salmaq qərarına gəlib. Təxirəsalma Rusiyanın AFK-ya potensial keçidi ilə əlaqədar əlavə məsləhətləşmələrə ehtiyacla bağlıdı. Səsvermənin 2022-ci il dekabrın 31-nə qədər keçirilməsi planlaşdırılır”.
RFİ-nin fəxri prezidenti Vyaçeslav Koloskov səsvermənin təxirə salınmasına belə reaksiya verib:
“Təxirəsalınmanın nə ilə bağlı olduğunu bilmirəm. Bunu bu qərarı verənlərdən soruşun. İK üzvləri arasında məsələyə fərqli münasibət var idi. Aydın məsələdi ki, mövzu ilə bağlı bir sıra suallar ortaya çıxır. Əsas sual RFİ-nin Asiyaya qəbul edilib-edilməyəcəyi ilə bağlıdı. Bu sual çoxlarını düşündürür. Fikrimcə, prosesdə FİFA və AFK-dan bununla bağlı təminat almaq məqsədilə fasilə verilib”.
Digər xəbərlər
