Veqhorst: “Messi artıq mənim adımı bilir”
Vut Veqhorst diqqətçəkən açıqlamalar verib.
30 yaşlı niderlandlı forvard son mundialın yaddaqalan simalarından biri oldu. Onun 1/4 finalda Argentina ilə oyunda sonradan meydana çıxaraq 2 qol vurması və ən əsası Lionel Messi ilə aralarında yaşananlar hələ uzun müddət xatırlanacaq. Messi matçın ardından jurnalislərə açıqlama verdiyi məqamda Veqhorsta “nə baxırsan, axmaq?” demiş və bu ifadə sosial şəbəkələrdə gündəm olmuşdu. Veqhorst ən son “Şanlıurfaspor”la görüşdə qələbə qolunu vuraraq “Beşiktaş”da 15-ci rəsmi oyunda 7 qol, 4 məhsuldar ötürmə göstəricisinə çatdı. Təcrübəli futbolçu oyundan sonra Qətərdə yaşadıqları ilə bağlı bunları dedi:
“Peşəkar karyeramın bəlkə də ən gözəl üç həftəsini geridə buraxdım. Argentina ilə oyundakı penalti seriyası məni sakit buraxmır. Tez-tez gözümün önünə gəlir. Öz-özümə “başqa cür olsaydı, nə olacaqdı” kimi suallar verirəm. Hələ bir müddət də bu məsələ beynimdən çıxmayacaq. Ən azı bu fürsəti yaxaladığım üçün xoşbəxtəm. Çünki DÇ-də oynamaq uşaqlıq arzum idi. İnanılmaz bir təcrübə qazandım. Düzünü desəm, biz mübarizəni dayandırdıqdan sonra kimin çempion olması artıq məni qətiyyən maraqlandırmadı. Mənim üçün meydanda istər Messi olsun, istə Burak Yılmaz olsun, hər kəs eynidi. Həmişə komandam üçün savaşıram. Həmin gün də məhz bunu etdim. Matçın gedişində Messi ilə aramızda xırda anlaşılmazlıqlar oldu. Yəqin ki, buna təəccübləndi. Çox da xırdalıqlara girmək istəmirəm. Futbolçu kimi ona hörmət edirəm və ən güclülərdən biridi. Oyundan sonra, sadəcə, bu hörmətimi gösətrmək istədim. Görünür, buna hazır deyildi. Ən azı artıq mənim adımı bilir. Bunun özü də pozitiv bir məqamdı”.
Digər xəbərlər
