MBA oyunları ilə bağlı başqa maraqlı məqamlar da var.

Football-plus.az xəbər verir ki, “Finiks” srağagün evdə “Leykers”i darmadağın etdi. Ədalət naminə “gölməçəsevərlər”in bu oyunda əsas ulduzlarından Entoni Devislə Lebron Ceymsin xidmətindən zədə üzündən məhrum olduğunu da vurğulayaq.

“Vaşinqton” isə dünən səfərdə “Finiks”ə qalib gəlməklə 10 oyunluq məğlubiyyət seriyasını qırdı.

Yeri gəlmişkən, “Finiks” yaxın günlərdə yeni sahibinə satılmalıdı. Bu haqda xəbəri ESPN-in insayderi Edrian Voynarovski yayıb. Onun xəbərinə inansaq, amerikalı biznesmen Mettyu İşbiya “günəşlər”in yeni sahibi olacaq. İşbiya Miçiqan ştatında yerləşən, ipoteka kreditləşməsi ilə məşğul olan “United Wholesale Mortgage” şirkətinin yaradıcısı və baş direktorudu. “Forbes” onun sərvətini 5,1 milyard dollar həcmində dəyərləndirir.

Xatırladaq ki, “Finiks”in sahibi Robert Sarver sentyabrda klubu satışa çıxardığını elan edib. Hələ ötən ilin noyabrında ESPN-in əməkdaşı Bakster Holms Sarveri irqçilikdə və qadınlara nifrətdə suçlayan yazı yaymışdı. Milli Basketbol Assosiasiyasının müvafiq qurumu isə həmin yazı əsasında təhqiqat aparıb.