Sarver “Finiks”i satışa çıxardı
“Finiks Sans” və “Finiks Merkuri”nin sahibi Robert Sarver bu iki klubu satışa çıxardığını elan edib.
Football-plus.az xəbər verir ki, ESPN-in əməkdaşlı Bakster Holms ötən ilin noyabrında dərc etdirdiyi yazıda Sarveri irqçilikdə və qadınlara nifrət bəsləməkdə suçlayıb. Milli Basketbol Assosiasiyası isə bu məqalə əsasında təhqiqata başlayıb. Araşdırmanın gedişində 320-dən artıq adam dindirilib və iş üzrə 80 min materiala baxılıb. Nəticədə ittihamlar təsdiqini tapıb. Sarver sosial şəbəkə hesabında izahat verməli olub:
“Dərin təəssüf hissi ilə bildirirəm ki, işlətdiyim sözlər iki onillik ərzində gördüyüm işlərə kölgə salır. Məhz bu işlər sayəsində “Finiks”in kişi və qadın basketbol komandalarını özündə birləşdirən möhkəm təşkilat yaranıb. İnanclı adam kimi günahların təmizlənməsinə və bağışlanmağa aparan yola inanıram. Gözləyirdim ki, komissarın birillik diskvalifikasiyası mənə səfərbər olmaq, günahımı gözdən keçirmək, mənim və azarkeşlərin sevdiyi klublarda şəxsi fikir ayrılıqlarını aradan qaldırmaq üçün imkan yaradacaq. Ancaq indiki amansız mühitdə mənə aydın oldu ki, bu artıq mümkünsüzdü: dediyim ifadələr artıq gördüyüm və ya bundan sonra görə biləcəyim bütün yaxşı işləri üstələyir. Bu üzdən “Sans” və “Merkuri” üçün alıcı axtarmaq prosesinə başlayıram. Bütün dünyadan olan basketbol həvəskarlarına sevinc bəxş etmək üçün yorulmadan çalışan adamları və bu iki klubu yolundan yayındırmaq istəmirəm. Bu iki klub, oyunçular, əməkdaşlar, azarkeşlər, camiələr, klub sahibi olan həmkarlarım və MBA üçün hər şeyin ən yaxşısını arzulayıram. “Sans” və “Merkuri”yə azarkeşliyi davam etdirdiyinizə görə sağ olun”.
Artıq MBA komissarı Adam Silver də Sarverin sahibi olduğu kişi və qadın basketbol komandalarını satmaq qərarını şərh edib:
“Robert Sarverin “Sans”la “Merkuri”ni satmaq qərarını tam dəstəkləyirəm. Bu, klub üçün də doğru addımdı”.
Sarver bu iki klubu satmaqla yanaşı, birilliyə basketbol təsərrüfatından uzaqlaşdırılıb və 10 miyon dollar cərimə ödəməli olacaq. O həmçinin personala hörmət mövzusunda öyrədici kursa da getməlidi.
Digər xəbərlər
