“Sakramento” ardıcıl 16-cı mövsümdə MBA-nın pley-offunda oynamayacaq ki, bu da dünyanın ən nüfuzlu basketbol liqası üçün antirekorddu.

Aprelin 4-də “Qolden Steyt”ə 90:109 hesabıyla uduzan Kaliforniya klubu pley-offda oynamaq baxımından son şansını da itirib. “Kinqs”in bu acı seriyası 2006-dan bəru uzanır. Komanda məhz həmin il sonuncu dəfə pley-offda görünüb və elə ilk mərhələdə “San-Antonio”ya (seriyada hesab 2:4) uduzmaqla mübarizəni dayandırıb.

“Finiks” – “Leykers” oyununun nəticəsi “gölməçəsevərlər”in azarkeşlərinin son ümidlərini də “dəfn etdi”. İlk növbədə onu qeyd edək ki, cari mövsümdə 63-cü qələbəsini qazanan “günəşlər” bu mənada yeni klub rekordu müəyyənləşdirdi. Onların indiyə qədər heç bir mövsümdə bu qədər qələbəsi olmamışdı. “Finiks” Qərb konfransında liderliyi təmin etdisə, ardıcıl 6-cı məğlubiyyət “Leykers”in nəinki pley-off, hətta pley-in oyunlarına vəsiqə şansını da heçə endirdi. Los-anceleslilər artıq heç bir halda turnir cədvəlində 11-ci pillədən yuxarı qalxa bilməyəcək. Uğuruzluqların məntiqi nəticəsi kimi klub rəhbərliyi mövsüm bitən kimi baş məşqçi Frenk Vogeli istefaya göndərməyi planlaşdırır. 2019-cu ildən “sükan arxasında” olan Vogel 2020-də komandanı MBA çempionu edib.

Ümumiyyətlə, Qərb konfransında pley-off və pley-in mərhələlərinin bütün iştirakçıları müəyyənləşib. “Finiks”, “Memfis”, “Qolden Steyt”, “Dallas” və “Yuta”nın pley-offda oynayacağı dəqiqdi. 6-cı pillədə qərarlaşan “Denver” “Klippers”, “Nyu-Orlean” və “San-Antonio”nun iştirakının dəqiqləşdiyi pley-in zonasına yuvarlana bilər. 7-ci yerdəki “Minnesota”nın isə pley-off zonasına qalxması mümkündü. Xatırladaq ki, hər konfransda 7-10-cu yerlərdə qərarlaşan komandalar pley-offa son iki vəsiqə üçün pley-in oyunlarına çıxacaq. Pley-in oyunları aprelin 12-15-i aralığında keçiriləcək, pley-off isə aprelin 16-da start götürəcək.

6 aprel
Bruklin – Hyuston 118:105 (30:25, 34:22, 26:27, 28:31)
Mayami – Şarlott 144:115 (29:32, 41:28, 32:37, 42:18)
Toronto – Atlanta 118:108 (27:31, 29:21, 33:31, 29:25)
Minnesota – Vaşinqton 114:132 (38:35, 28:32, 27:34, 21:31)
Oklahoma-Siti – Portlend 98:94 (29:27, 19:27, 19:28, 31:12)
Çikaqo – Miluoki 106:127 (20:26, 26:32, 36:38, 24:31)
Denver – San-Antonio 97:116 (30:32, 14:32, 35:21, 18:31)
Yuta – Memfis 121:115 ОТ (24:19, 26:31, 33:33, 27:27, 11:5)
Sakramento – Nyu-Orlean 109:123 (25:27, 32:33, 27:35, 25:28)
İndiana – Filadelfiya 76 122:131 (31:33, 28:49, 40:25, 23:24)
Finiks – Leykers 121:110 (28:31, 35:27, 35:22, 23:30)
Orlando – Klivlend 120:115 (35:36, 24:25, 32:25, 29:29)