Türkiyə yığmasının aparıcı müdafiəçisi Çağlar Söyüncünün bu mövsüm ''Lester''dəki performansı ötən mövsümdəkindən bir qədər geri qalsa da, istedadlı futbolçu ötən həftə öz oyunu ilə diqqət çəkməyi bacarıb.

Futbolçuların performansını dəyərləndirən platforma kimi tanınan ''Comparisonator''un versiyasına görə Çağlar premyer-liqada 34-cü turun rəmzi yığmasına düşüb. ''Lester'' həmin tur ''Aston Villa'' səfərindən qolsuz bərabərliklə ayrılıb və Çağlar da müdafiədəki inamlı oyunu, vacib müdaxilələri ilə diqqət çəkib.

Çağlardan başqa turun rəmzi yığmasına ''Lids''in qapıçısı İlan Melye, ''Liverpul''un üç üzvü Endryu Robertson, Yoel Matip, Trent Alexander-Arnold, ''Nyukasl''lı Bruno Gimarayeşlə Joelinton, ''Sauthempton''un kapitanı Ceyms Uord-Praus, ''Kristal Pelas''lı Vilfrid Zaha, ''Mançester Siti''dən Kevin De Bruyne ilə Qabriel Jesus da düşüb. Çağların bu yay karyerasında yeni mərhələyə qədəm qoyacağı və Avropa nəhənglərindən birinə keçəcəyi gözlənilir. Qeyd edək ki, 25 yaşlı futbolçu 2020/21-də İngiltərə çempionatında mövsümün rəmzi yığmasına seçilmişdi.