Türkiyə futbolunda son illərdə yetişən ən istedadlı müdafiəçilərdən olan Çağlar Söyüncü bu mövsüm bəlkə də peşəkar karyerasının ən çətin dönəmini yaşayır.

26 yaşlı futbolçu ''Lester''də gününü ehtiyat oyunçular skamyasında keçirir. O, bu mövsüm premyer-liqada 1 dəqiqə belə oynamaq şansı qazanmayıb və yalnız liqa kubokunda ''Stokport''la oyunda 90 dəqiqə meydanda olub. 5-ci turda ''Mançester Yunayted''ə evdə 0:1 hesablı məğlubiyyətin ardından baş məşqçi Brendan Rocers ''Çağlar nə üçün oynamır'' sualına ''çünki indiki forması bizi qətiyyən qane etmir'' sözü ilə cavab vermişdi. Futbolçu məşqçisinin bu açıqlamasına cavab olaraq Mövlanə Cəlaləddin Ruminin ''bütün yaxşı şeylər səbirdən sonra gəlir'' sözünü paylaşmışdı. Əslində isə problemin kökü tamam başqadı. Çağların ''Lester''lə müqaviləsi mövsümün sonunda başa çatır. ''Tülkülər''in yeni müqavilə təklifini rədd edən müdafiəçi yanvardan etibarən istədiyi klubla danışıqlar aparmaq hüququna malikdi. Yəni ''Lester'' faktiki olaraq onun əldən çıxması ilə barışıb. Bu üzdən Brendan Rocers min bir bəhanə ilə onu oynatmaqdan imtina edir. Digər tərəfdən Rocersin özü də qovulmaq üzrədi. Çünki premyer-liqada qələbəsi olmayan yeganə klub olan ''Lester'' sonuncu pillədən möhkəm yapışıb. Çağların yeni klubuna gəlincə, hər şey ona işarə edir ki, futbolçu karyerasını Madriddə davam etdirəcək. Bir çox mənbələr onun '' Atletiko'' ilə anlaşdığını xəbər verir. Elə Çağların ''Altınordu''da ilk məşqçisi olan və onun yüksəlişində böyük rol oynayan Hüseyin Eroğlu da bir müddət öncə sabiq yetirməsinin məhz ''Atletiko'' ilə anlaşdığını xəbər vermişdi. Amma madridlilərin sürpriz rəqibi peyda olub. ''Qazetta dello Sport''un bu günkü sayında yerləşdirilən məlumata əsasən ''İnter'' Söyüncüyə yaxından maraq göstərməyə başlayıb. İtaliya nəhənginin rəsmiləri türkiyəlinin meneceri ilə əlaqə saxlayaraq transferin şərtləri ilə maraqlanıblar.

Xatırladaq ki, Çağlar 2019/20-də premyer-liqada mövsümün rəmzi ''11-liy''inə seçilmişdi.