Beynəlxalq İdman Mətbuatı Assosiasiyası (AIPS) “ilin kişi idmançısı”, “ilin qadın idmançısı” və “ilin komandası” nominasiyaları üzrə namizədlərinin adını açıqlayıb.

Football-plus.az xəbər verir ki, bu məlumatı qurumun mətbuat xidməti yayıb. “İlin kişi idmançısı” nominasiyasında 27 nəfərin adı çəkilib ki, onlar arasında futbolçulardan Sofyan Amrabat, Kərim Benzema, Robert Levandovski, Sadio Mane, Kilian Mbappe, Lionel Messi, “Formula-1” pilotlarından Serxio Peres və Maks Ferstappen, biatlonçu Yohannes Be, tennisçilər Rafael Nadal və Rocer Federer, basketbolçu Yannis Adetokumbo da var.

“İlin qadın idmançısı” adına 30 namizəd var. Gimnast Simona Baylz, xizəkçi Tereza Yohauq, üzgüçü Keti Ledeki, tennisçilər Naomi Osaka, Ons Jaber və Serena Uilyams, futbolçu Aleksiya Putelyas siyahıya düşən adlardandı.

“İlin komandası” adı uğrunda Argentina, Xorvatiya, Fransa və Mərakeşin futbol yığmaları, “Çelsi”, “Bavariya”, PSJ və “Real”, Finlandiyanın kişilərdən ibarət hokkey yığması, “Formula-1” komandalarından “Red Bull”, MBA çempionu “Qolden Steyt” də var. Ümumilkdə 20 komanda siyahıya düşüb. Jurnalistlərin səsverməsi dekabrın 29-na qədər davam edəcək.