Misli premyer-liqasında 10-cu tura yekun vurulub.

Turun son qarşılaşmasında “Qarabağ” “Sumqayıt”ı
məğlub edib - 3:1. Oyundan sonra ağdamlıların çalışdırıcısı Qurban Qurbanovun mətbuat konfransı keçirilib. Sizi mütəxəssisin fikirləri ilə tanış edirik:

- Komandada yorğunluq aradan qalxırmı?
- Xeyr. Elə zamandayıq ki, futbolçuların yorğunluqdan sonra dərhal özlərinə gələcəklərini deyə bilmərik. 4 gün sonra yenə oyunumuz var. Futbolçularımızın yaxşı durumunu geri qaytarmağa çalışacağıq. Çempionat oyunları gərgin keçir. Asan deyil.

- Kevin Medinanın müdafiənin solunda çıxış etməsi nə ilə bağlı idi?
- Daha əvvəl də “Sumqayıt”a qarşı bu mövqedə oynamışdı. Variantlardan biridi. Bu gün Rahil, Maksim və onun meydanda olmasını istəyirdim. Oyun praktikaları üçün bu, vacib idi. Qarşıda yenə belə addım ata bilərik.

- Bu mövsümkü çempionatın daha rəqabətli olduğunu düşünürsüz?
- Mənim üçün xoşdu. Azərbaycanlı kadrlarımızın hərəsinin bir komandanın başında olmasına ancaq sevinə bilərik. Bölgələrə getmək çox maraqlıdı. Tovuzda ilk çempionluğumu yaşamışam. Gəncədə azarkeş kütləsi, ajiotaj çox yaxşıdı. Oraların futbol mədəniyyətini yenidən yada salmaq çox xoşdu.

- “Nant”la matç barədə düşünürsüz?
- Hələ vaxta var. Qarşıda çempionat matçımız var. Hazırlaşmaq üçün vaxtımız olacaq. Futbolçuları optimal formaya gətirməyə çalışacağıq.

- Kadi “Nant”la oyuna hazır ola bilər?
- Vəziyyəti yaxşılığa doğru gedir. Qarşıdakı matçda oynayıb-oynamayacağını hələ bilmirik. Gələn həftə daha dolğun cavab verə biləcəyik.

- Komanda rotasiyalar etsə də, oyunboyu üstün idi. Qollar isə əvəzetmələrdən sonra vuruldu…
- Dəyişiklik çox olmuşdu. Belə müdafiə olunan komandalara qarşı ilk dəqiqələrdən nəsə etmək çətindir. İlk hissədə hücum xəttində çoxlu dəyişikliklər var idi. Bizim oyunçuları yaxşı tanıyırlar. İkinci yarıda sürəti artırmaq, daha çox topa sahib olmaq lazım idi. Daha təcrübəli futbolçulardan istifadə edə bildik. Bu o demək deyil ki, onlar ilk yarıda meydanda olsaydılar, qol vurardıq. Birinci hissədə komandalar daha canlı olurlar.